हिंगोली : हिंगोली जिल्ह्यात वारंवार भूगर्भातून येणारा गूढ आवाज आणि अधूनमधून जाणवणाऱ्या भूकंपाच्या धक्क्यांमुळे नागरिकांमध्ये भीतीचे वातावरण निर्माण झाले आहे. विशेषतः वसमत, कळमनुरी आणि औंढा नागनाथ तालुक्यांमध्ये सर्वाधिक भूकंपाचे धक्के जाणवले आहेत.
गेल्या २४ तासांत ३ पेक्षा जास्त तीव्रतेचे दोन धक्के नोंदवले गेले असून, त्यातील सर्वात मोठा धक्का ४.५ रिश्टर तीव्रतेचा आहे. हा धक्का आज, शनिवार, दि. ३ ऑक्टोबर २०२६ रोजी सकाळी ७ वाजून ४६ मिनिटांनी हिंगोलीपासून आग्नेय दिशेला २० किलोमीटर अंतरावर नोंदवला गेला.
दरम्यान, औंढा नागनाथ तालुक्यातील गढाळा परिसरातही आज सकाळी भूगर्भातून आवाजासह ३.३ तीव्रतेचा धक्का जाणवला.
२०२६ या वर्षापासून हिंगोली जिल्ह्यात २ पेक्षा जास्त तीव्रतेचे एकूण १९ धक्के नोंदवले गेले आहेत. यामध्ये ४ पेक्षा जास्त तीव्रतेचे ४ धक्के, ३ ते ४ तीव्रतेचे १४ धक्के आणि २ ते ३ तीव्रतेमधील एका धक्क्याचा समावेश आहे.
गेल्या १० वर्षांत ५० किलोमीटर परिसरात एकूण ५४ धक्के नोंदवले गेले असून, त्यापैकी ४२ धक्के हे ३ पेक्षा जास्त तीव्रतेचे आहेत.
सतत येणाऱ्या गूढ आवाजांमुळे आणि जमीन हादरण्याच्या घटनांमुळे ग्रामीण भागातील नागरिक भयभीत झाले आहेत. अनेक ठिकाणी घरांना तडे गेल्याच्या तक्रारीही समोर आल्या आहेत.
जिल्हा आपत्ती व्यवस्थापन कक्षाने आजच्या धक्क्यांमुळे कोणतीही जीवित अथवा वित्तहानी झाली नसल्याचे स्पष्ट केले आहे. मात्र, वारंवार जाणवणाऱ्या भूकंपाच्या धक्क्यांचा सखोल अभ्यास करण्यासाठी भूगर्भ तज्ज्ञांची पाहणी करावी, अशी मागणी नागरिकांमधून जोर धरू लागली आहे.
