उदगीर ग्रामीण पोलिसांची कारवाई; १३७ ओल्या गांजाच्या रोपट्यांसह ३७० ग्रॅम सुका गांजा हस्तगत
उदगीर : करडखेल (ता. उदगीर) येथील एका शेतात अवैधरीत्या गांजाची लागवड करून तो विक्रीच्या उद्देशाने बाळगल्याचा प्रकार उदगीर ग्रामीण पोलिसांनी उघडकीस आणला. या कारवाईत पोलिसांनी १३७ गांजाची रोपटे तसेच ३७० ग्रॅम सुका गांजा, असा एकूण १ किलो १९० ग्रॅम गांजा, अंदाजे ५९ हजार ५०० रुपयांचा मुद्देमाल जप्त केला. या प्रकरणी अंगद हरीबा भंडारे (वय ४८, रा. करडखेल) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, ९ ऑगस्ट रोजी दुपारी १२.५० वाजता करडखेल येथील आरोपीच्या शेतात ही कारवाई करण्यात आली. शेतात हिरवट रंगाची, उग्र वासाची १३७ ओल्या गांजाची रोपटे आढळून आली. त्यांचे वजन ८२० ग्रॅम असून किंमत अंदाजे ४१ हजार रुपये आहे. तसेच पाने व बोंडे असलेला ३७० ग्रॅम सुका गांजा, अंदाजे १८ हजार ५०० रुपये किमतीचा, पोलिसांना मिळून आला.
आरोपीने स्वतःच्या आर्थिक फायद्यासाठी गांजाची अवैध विक्री करण्याच्या उद्देशाने शेतात गांजाची लागवड करून तो बाळगल्याचे पोलिसांच्या फिर्यादीत नमूद करण्यात आले आहे. याप्रकरणी एनडीपीएस कायदा १९८५ मधील कलम ८(क), २०(अ)(१), २०(ब) अन्वये गुन्हा दाखल करण्यात आला आहे.
गुन्ह्याची नोंद रात्री ८.१४ वाजता करण्यात आली. पुढील तपास सहाय्यक पोलीस निरीक्षक बेंबडे यांच्याकडे सोपविण्यात आला आहे.
ही कारवाई पोलीस निरीक्षक दिलीप गाडे, उपविभागीय पोलीस अधिकारी अरविंद रायबोळे, पोलीस उपनिरीक्षक काळे तसेच उदगीर ग्रामीण पोलिसांच्या पथकाने केली.
