गावडेवाडी-शिरसवडी रस्त्यावर थरार; तीन अज्ञात आरोपींविरोधात गुन्हा, वापरलेल्या दोन दुचाकींपैकी एक चोरीची असल्याची माहिती
पुण्यातील वाघोली परिसरात व्यावसायिकावर जीवघेणा हल्ला करून लाखो रुपयांचे सोन्याचे दागिने लुटल्याची धक्कादायक घटना समोर आली आहे. गावडेवाडी-शिरसवडी रस्त्यावर तिघा अज्ञात आरोपींनी कार अडवून गोळीबार केला. या हल्ल्यात व्यावसायिक गंभीर जखमी झाले असून, त्यानंतर त्यांच्या अंगावरील सुमारे 22 तोळे सोन्याचे दागिने लुटून आरोपी फरार झाले. या प्रकरणाचा तपास लोणीकंद पोलीस करत आहेत.
पोलिसांनी दिलेल्या माहितीनुसार, संतोष ज्ञानोबा गावडे (वय 50, रा. गावडेवाडी, शिरसवडी, ता. हवेली) हे मंगळवारी रात्री सुमारे 9 वाजण्याच्या सुमारास कारने आपल्या घरी जात होते. त्याचवेळी दोन दुचाकींवरून आलेल्या तीन अज्ञात इसमांनी त्यांची कार अडवली आणि त्यांच्यावर गोळीबार केला. या गोळीबारात गावडे यांच्या जबड्याला गोळी लागल्याने ते गंभीर जखमी झाले. त्यांच्यावर सध्या खासगी रुग्णालयात उपचार सुरू आहेत.
हल्ल्यानंतर आरोपींनी जखमी अवस्थेतील गावडे यांच्या अंगावरील सुमारे 22 तोळे सोन्याचे दागिने, ज्यांची अंदाजे किंमत 11 लाख रुपये आहे, जबरदस्तीने हिसकावून नेले. मात्र त्यांच्या हातातील सुमारे 10 तोळ्यांचे सोन्याचे कडे आरोपींना काढता आले नाहीत. त्यानंतर तिन्ही आरोपी घटनास्थळावरून पळ काढण्यात यशस्वी झाले.
प्राथमिक तपासात या गुन्ह्यात वापरण्यात आलेल्या दोन दुचाकींपैकी एक दुचाकी चोरीची असल्याचे समोर आले आहे. या प्रकरणी लोणीकंद पोलिसांनी तिघा अज्ञात आरोपींविरोधात गुन्हा नोंदवून तपासाची चक्रे वेगाने फिरवली आहेत. आरोपींचा शोध सुरू असून या घटनेमुळे वाघोली परिसरात भीतीचे वातावरण निर्माण झाले आहे.
