संगमनेर ते राजगुरुनगर टोलनाका ट्रकचा पाठलाग; गुटखा, पानमसाला आणि ट्रक जप्त, चौघांविरोधात गुन्हा दाखल
पुणे : मध्यप्रदेशातून महाराष्ट्रात बेकायदेशीर विक्रीसाठी आणला जात असलेला प्रतिबंधित गुटखा अन्न व औषध प्रशासनाच्या (FDA) पथकाने मोठी कारवाई करत जप्त केला आहे. संगमनेरपासून राजगुरुनगर टोलनाक्यापर्यंत तब्बल सहा तास ट्रकचा पाठलाग केल्यानंतर ही कारवाई करण्यात आली. या कारवाईत १ कोटी १३ लाख ५४ हजार ६०० रुपये किमतीचा गुटखा, पानमसाला आणि ट्रक जप्त करण्यात आला आहे.
गुप्त माहिती मिळताच FDAची कारवाई
पुणे अन्न व औषध प्रशासनाच्या अधिकाऱ्यांना मध्यप्रदेशातून मोठ्या प्रमाणात प्रतिबंधित गुटखा महाराष्ट्रात आणला जात असल्याची माहिती मिळाली होती. या माहितीच्या आधारे १८ सप्टेंबर रोजी FDAच्या पथकाने संबंधित ट्रकचा माग काढण्यास सुरुवात केली.
संगमनेरपासून सुरू झालेला हा पाठलाग राजगुरुनगर टोलनाक्यापर्यंत जवळपास सहा तास सुरू होता. अखेर FDAच्या पथकाला ट्रक अडवून ताब्यात घेण्यात यश आले. तपासणीदरम्यान ट्रकमध्ये प्रतिबंधित गुटखा आणि पानमसाला आढळून आला.
चौघांविरोधात गुन्हा दाखल
या कारवाईनंतर अन्न व औषध प्रशासनाने दिलेल्या तक्रारीवरून चाकण उत्तर पोलीस ठाण्यात भारतीय न्याय संहितेच्या (BNS) विविध कलमांनुसार गुन्हा दाखल करण्यात आला आहे.
या प्रकरणात नफीस मेहबूब खान (वाहन चालक), निलेश राठी आणि अरुण पाटील (पुरवठादार), मेसर्स जे. एम. डी. इंटरप्रायझेस (वाहन मालक) आणि संजय माटा (वाहतूकदार) यांच्याविरोधात गुन्हा दाखल करण्यात आला आहे.
MCOCA अंतर्गत कारवाईची शिफारस
राज्यात प्रतिबंधित असलेल्या गुटख्याची वाहतूक आणि विक्री करण्याचा प्रकार संघटित गुन्हेगारीशी संबंधित असल्याचे नमूद करत, संबंधित आरोपींवर मोक्का (MCOCA) कायद्यांतर्गत कारवाई करण्याची सूचना अन्न व औषध प्रशासनाने पोलिसांना केली आहे.
दरम्यान, चाकण पोलीस या प्रकरणाचा पुढील तपास करत असून, प्रतिबंधित गुटख्याच्या पुरवठ्यामागील इतर बाबींचाही तपास केला जात आहे.
