पालक मंत्री नरहरी झिरवाळ यांच्या हस्ते होणार उद्घाटन
हिंगोली (Mission Urja Abhiyan) : जिल्ह्यात महिला सुरक्षा, सायबर सुरक्षा, अमली पदार्थ विरोध आणि रस्ते सुरक्षा या विषयांवर जनजागृती करण्यासाठी पोलीस अधीक्षक डॉ. श्रेणिक लोढा यांच्या संकल्पनेतून राबवण्यात येणाऱ्या "मिशन ऊर्जा" अभियानाचा समारोप सोमवार 11 ऑगस्ट 2026 रोजी हिंगोलीत होणार असल्याची माहिती सोमवारी पत्रकार परिषद.
मिशन ऊर्जा च्या अनुषंगाने पोलीस अधीक्षक कार्यालयात आयोजित केलेल्या पत्रकार परिषदेत जिल्हा पोलीस अधीक्षक डॉक्टर श्रेणिक लोढा यांनी सांगितले की, 3 ऑगस्ट पासून सुरू झालेल्या या अभियाना अंतर्गत जिल्ह्यातील सर्व माध्यमिक, उच्च माध्यमिक आणि कनिष्ठ महाविद्यालयां मध्ये विविध स्पर्धा घेण्यात आल्या. चित्रकला, वक्तृत्व, घोषवाक्य, रांगोळी, निबंध आणि रील्स स्पर्धांमधून विद्यार्थ्यांनी मोठ्या संख्येने सहभाग नोंदवला. 1930 सायबर क्राईम हेल्पलाईन, 112 पोलीस मदत आणि 1098 चाईल्ड हेल्पलाईन यांची माहिती देणारे फलक आणि बॅनर्सही शाळांमधून तयार करण्यात आले. जवळपास 35 हजार विद्यार्थ्यांनी यामध्ये सहभाग नोंदीला असून पाच ते सात हजार पोस्टर प्राप्त झाले आहेत.
या (Mission Urja Abhiyan) अभियानाचा मुख्य कार्यक्रम उद्या 11 ऑगस्ट रोजी सकाळी 9 वाजता हिंगोली शहरात पार पडणार आहे. शहरातील इयत्ता 7 वी ते 12 वी च्या सुमारे 8 ते 10 हजार विद्यार्थ्यांची भव्य जनजागृती रॅली काढण्यात येणार आहे. बहुविध प्रशाला, जिल्हा परिषद मैदान येथून सुरू होणारी ही प्रभातफेरी संत नामदेव कवायत मैदानावर संपन्न होईल.
रॅलीनंतर मुख्य कवायत मैदानावर महाराष्ट्र राज्याचे अन्न व औषध प्रशासन मंत्री तथा हिंगोलीचे पालकमंत्री नरहरी झिरवळ यांच्या हस्ते "मिशन ऊर्जा" जनजागृती कार्यक्रमाचे उद्घाटन होईल. खासदार रामराव वडकुते, खासदार नागेश पाटील आष्टीकर, आमदार प्रज्ञाताई सातव, तान्हाजीराव मुटकुळे, संतोष बांगर, चंद्रकांत नवघरे, नांदेड परिक्षेत्राचे पोलीस उप महानिरीक्षक शहाजी उमाप, जिल्हाधिकारी राहुल गुप्ता आणि जिल्हा परिषदेचे मुख्य कार्यकारी अधिकारी विवेक गायकवाड यांच्यासह जिल्ह्यातील अनेक मान्यवर या कार्यक्रमाला उपस्थित राहणार आहेत.
कार्यक्रमात सरजुदेवी शाळा, माणिक स्मारक विद्यालय आणि भारतीय विद्या मंदिर येथील विद्यार्थी 112, 1930 आणि 1098 या आपत्कालीन क्रमांकांवर आधारित देखावे ड्रोनद्वारे सादर करतील. शेवटी सर्व विद्यार्थी, शिक्षक आणि उपस्थित मान्यवरांकडून अमली पदार्थ विरोधी शपथ घेण्यात येणार आहे.
तसेच 12 ऑगस्ट रोजी ज्या शाळा- महाविद्यालयांमध्ये प्रोजेक्टरची सुविधा आहे, तेथे विद्यार्थ्यांची पथनाट्ये सादर होणार असून त्यानंतर पोलीस विभागातर्फे सुरक्षा विषयांवरील डॉक्युमेंटरी आणि PPT च्या माध्यमातून कायदे व सुरक्षेबाबत मार्गदर्शन केले जाणार आहे. सुरक्षित समाजासाठी तरुण पिढीला जागरूक करण्याच्या उद्देशाने राबवले जाणारे हे अभियान जिल्ह्यात मोठ्या उत्साहात राबवले जात आहे.
