हिंगोली शहर पोलिसात आकस्मात मृत्यूची नोंद
हिंगोली (Hingoli Centering Work Death) : शहरातील सिध्दार्थ नगर भागामध्ये एका बांधकामाच्या ठिकाणी सेंट्रींगचे काम सुरू असताना कोथळज येथील ४० वर्षीय मजूरदाराच्या डोक्यावर सेंट्रींगची प्लेट पडून जखमी झाला होता. त्याच्यावर रुग्णालयात उपचार सुरू असताना त्याचा मृत्यू झाला.
याबाबत पोलिस सुुत्रांकडून मिळालेली माहिती अशी की, हिंगोली शहरातील सिध्दार्थ नगर भागामध्ये एका ठिकाणी बांधकाम सुरू होते. सदर बांधकामावर काही मजूरदार काम करीत होते. या ठिकाणी सेंट्रींगचे काम ५ जुलै रोजी सुरू असल्याने कोथळज येथील गजानन नारायण सुतारे (४०) हा मजूरदार सुतारी काम करून सेंट्रींगच्या प्लेटा बसविता होता. या दरम्यान त्याच्या डोक्यावर सेंट्रींगची प्लेट पडल्याने गंभीररित्या जखमी झाल्याने उपस्थित असलेल्या मजूरदारांनी व इतरांनी त्यांना तात्काळ हिंगोलीतील रूग्णालयात दाखल केले होते.
या ठिकाणी त्यांच्यावर प्रथमोपचार करून नांदेड विष्णुपुरी येथील शासकीय रूग्णालयात उपचारासाठी दाखल केले होते. त्यांच्यावर उपचार सुरू असताना ६ जुलै रोजी त्यांचा मृत्यू झाला. याबाबत हिंगोली शहर पोलिसात एस.के. गायकवाड यांनी दिलेल्या माहिती वरून आकस्मात मृत्यूची नोंद घेण्यात आली. या प्रकरणाचा पुढील तपास पोलिस निरीक्षक देवेंद्रसिंह ठाकुर यांच्या मार्गदर्शनाखाली पोलिस हवालदार सुनिल अंभोरे हे करीत आहेत.
