गंगाखेड (House Burglary) : गंगाखेड शहरातील रजा कॉलनी परिसरात अज्ञात चोरट्यांनी घरफोडी करत सोन्या-चांदीचे दागिने आणि रोख रक्कम असा एकूण १ लाख ३५ हजार रुपयांचा मुद्देमाल लंपास केला. या प्रकरणी २२ मे रोजी गंगाखेड पोलीस ठाणे येथे गुन्हा दाखल करण्यात आला आहे.
याबाबत सय्यद मोईज यांनी तक्रार दिली आहे. फिर्यादी हे पत्नी आणि मुलाबाळांसह १७ मे रोजी सासरवाडी चाकूर येथे गेले होते. २० मे रोजी मध्यरात्री शेजाऱ्यांनी फोन करून त्यांच्या घरातून अज्ञात व्यक्ती पळून गेल्याची माहिती दिली.
त्यानंतर दुसऱ्या दिवशी सकाळी फिर्यादी घरी आल्यानंतर त्यांनी पाहणी केली असता घरफोडी झाल्याचे निदर्शनास आले. चोरट्यांनी २४ तोळे चांदीचे दागिने, ४५ हजार रुपये किमतीचे सोन्याचे दागिने तसेच ६० हजार रुपये रोख रक्कम चोरून नेल्याचे आढळून आले.
या प्रकरणी गंगाखेड पोलिसांनी गुन्हा नोंदवून पुढील तपास सुरू केला आहे. दरम्यान, चोरट्यांनी शेजारील कॉलनीत राहणाऱ्या निर्मला पाटेकर यांच्या घरी देखील चोरी केल्याची माहिती समोर आली आहे.
