शिरपूर पोलीस ठाणे हद्दीतील अवैध धंदे बंद करण्याची मागणी; निवेदनाची सकारात्मक दखल
रिसोड : रिसोड तालुक्यातील शिरपूर पोलीस ठाणे हद्दीत सुरू असलेल्या अवैध धंद्यांविरोधात भारतीय जनता पार्टीच्या पदाधिकाऱ्यांनी आक्रमक भूमिका घेतली आहे. हे अवैध धंदे तात्काळ बंद करून संबंधितांवर कठोर कारवाई करावी, या मागणीसाठी भाजप पदाधिकाऱ्यांनी वाशिमचे पोलीस अधीक्षक यांची भेट घेऊन निवेदन सादर केले.
महाराष्ट्र भाजपचे प्रदेशाध्यक्ष रविंद्रजी चव्हाण यांच्या सूचनेनुसार हे निवेदन देण्यात आले. शिरपूर परिसरातील अवैध धंद्यांमुळे युवकांवर विपरीत परिणाम होत असून, सामाजिक वातावरण बिघडण्याची शक्यता आहे. भविष्यात कायदा आणि सुव्यवस्थेचा प्रश्न निर्माण होऊ नये, यासाठी संबंधित अवैध धंद्यांवर कठोर कारवाई करण्यात यावी, अशी मागणी भाजप पदाधिकाऱ्यांनी केली.
दरम्यान, भाजप पदाधिकाऱ्यांनी सादर केलेल्या निवेदनाची पोलीस अधीक्षकांनी सकारात्मक दखल घेतली. अवैध धंद्यांबाबत प्रशासनाकडून योग्य ती कार्यवाही करण्यात येईल, अशी भूमिका त्यांनी व्यक्त केली. तसेच नागरिकांच्या तक्रारी आणि कायदा-सुव्यवस्थेशी संबंधित बाबी गांभीर्याने घेतल्या जातील, असेही त्यांनी स्पष्ट केले.
पोलीस अधीक्षकांच्या या सकारात्मक भूमिकेमुळे शिरपूर परिसरातील अवैध धंद्यांवर कारवाई होण्याची अपेक्षा व्यक्त केली जात आहे. त्यामुळे आगामी काळात पोलिस प्रशासनाकडून नेमकी कोणती पावले उचलली जातात, याकडे परिसरातील नागरिकांचे लक्ष लागले आहे.
निवेदन देताना गजाननराव लाटे, जिल्हा महामंत्री, भारतीय जनता पार्टी वाशिम; सुभाषराव खरात, मंडल अध्यक्ष, भारतीय जनता पार्टी रिसोड; अमोल पाटील भुतेकर, ग्रामीण मंडळ अध्यक्ष, भारतीय जनता पार्टी रिसोड आणि भूषण दांदडे, महामंत्री, भारतीय जनता पार्टी रिसोड उपस्थित होते.
“अवैध धंदे बंद झालेच पाहिजेत; युवकांचे भविष्य सुरक्षित झालेच पाहिजे,” या भूमिकेसह भाजप पदाधिकाऱ्यांनी प्रशासनाकडून ठोस कारवाईची अपेक्षा व्यक्त केली.
