कळमनुरी : पावसाळा संपत आला तरी उर्ध्व पेनगंगा प्रकल्प अर्थात ईसापूर धरण पूर्ण क्षमतेने भरलेले नाही. २१ सप्टेंबर रोजी सकाळी ६ वाजता धरणाची पाणीपातळी ४३७.८९० मीटर नोंदविण्यात आली. गतवर्षी याच तारखेला पाणीपातळी ४४०.९० मीटर होती. यंदा पाणीपातळी ३.०१ मीटरने कमी आहे.
धरणातील एकूण पाणीसाठा ९७८.६६२४ दलघमी (३४.५६३ टीएमसी) असून उपयुक्त पाणीसाठा ६६३.६९८७ दलघमी (२३.४४० टीएमसी) आहे. उपयुक्त साठ्याची टक्केवारी ६८.८४ टक्के आहे. गतवर्षी याच दिवशी उपयुक्त पाणीसाठा ९५४.५३५५ दलघमी म्हणजेच ९९.०१ टक्के होता.
मागील २४ तासांत धरणात केवळ ०.२७४२ दलघमी पाण्याची आवक झाली असून सरासरी आवक ३.१७४ क्युमेक्स (११२ क्युसेक्स) आहे. १ जूनपासून आतापर्यंत एकूण २७९.७४४३ दलघमी पाण्याची आवक झाली आहे. यंदा १ जूनपासून आतापर्यंत ५७८ मिमी पावसाची नोंद झाली असून २१ सप्टेंबर रोजी पावसाची नोंद शून्य आहे.
पावसाळा संपत आला तरी धरण पूर्ण क्षमतेने भरलेले नसल्याने आगामी काळातील पाणी नियोजनाचा प्रश्न निर्माण झाला आहे. यंदा सरासरीच्या तुलनेत पावसाचे प्रमाण कमी राहिल्याने शेतकऱ्यांना खरीप हंगामात मोठ्या अडचणींचा सामना करावा लागत आहे. आता पुढील रब्बी हंगामासाठी पाणी उपलब्ध होणार का आणि पीक कसे घ्यायचे, असा प्रश्न शेतकऱ्यांसमोर उभा राहिला आहे.
