तंबाखू मागण्याच्या बहाण्याने भंगार व्यावसायिकावर हल्ला; सीसीटीव्ही फुटेजच्या आधारे पोलिसांची कारवाई, ८ जुलैपर्यंत पोलीस कोठडी
छत्रपती संभाजीनगर : शहरातील व्हीआयपी जालना रोडवर २ जुलैच्या पहाटे झालेल्या भंगार व्यावसायिक अब्दुल बासित हकीम खान यांच्या हत्येचा छडा लावण्यात पोलिसांना यश आले आहे. तपासादरम्यान समोर आलेल्या माहितीनुसार, टोळीच्या मुख्य सूत्रधाराला गोव्यात आलिशान क्रूझवर वाढदिवस साजरा करण्यासाठी पैशांची गरज होती. त्यासाठी शहरात लुटमारीचे प्रकार सुरू करण्यात आल्याचा धक्कादायक खुलासा झाला आहे. या प्रकरणात गुन्हे शाखेने मुकेश उर्फ मुक्या महेंद्र साळवे (वय २९) आणि विक्की उर्फ सोनू मधुकर पाचवणे (वय २२, दोघे रा. मुकुंदवाडी) यांना अटक केली असून न्यायालयाने त्यांना ८ जुलैपर्यंत पोलीस कोठडी सुनावली आहे.
तंबाखू मागितली, नकार मिळताच हल्ला
पोलिसांनी दिलेल्या माहितीनुसार, १ जुलै रोजी रात्री कामानिमित्त बाहेर पडलेले अब्दुल बासित मध्यरात्री सिडको बसस्थानकावरून रिक्षाने एसएफएस शाळेजवळ उतरले. त्यानंतर ते जिन्सीच्या दिशेने पायी निघाले असताना रात्री सुमारे अडीचच्या सुमारास आकाशवाणी चौकातील पंचम बारसमोर आरोपींनी त्यांना अडवले. त्यांनी प्रथम तंबाखूची मागणी केली. मात्र, "मी कोणतेही व्यसन करत नाही," असे अब्दुल यांनी सांगितल्यानंतर आरोपींनी त्यांचा मोबाईल हिसकावण्याचा प्रयत्न केला. यावेळी झालेल्या झटापटीत मुख्य आरोपी मुक्या साळवे याने त्यांच्या मांडीत खोलवर चाकूने वार केला. या हल्ल्यात मुख्य रक्तवाहिनी कापली गेल्याने प्रचंड रक्तस्त्राव झाला आणि उपचारादरम्यान त्यांचा मृत्यू झाला.
हत्या करून घरी जाऊन झोपले; सीसीटीव्हीतून पोलिसांपर्यंत पोहोचले
घटनेनंतर आरोपींनी पोलिसांची दिशाभूल करण्यासाठी मुख्य मार्ग टाळत अपेक्स रुग्णालय, चिश्तिया चौक, कॅनॉट प्लेस आणि सिडको ब्रिजमार्गे मुकुंदवाडीतील आपल्या घरी जाऊन विश्रांती घेतली. मात्र, त्यांच्या हालचाली परिसरातील सीसीटीव्ही कॅमेऱ्यांमध्ये कैद झाल्या होत्या. फुटेजमधील संशयितांच्या अंगकाठीवरून गुप्त बातमीदाराने मुख्य आरोपी मुक्या साळवेची ओळख पटवली. त्यानंतर गुन्हे शाखेचे पोलीस निरीक्षक गजानन कल्याणकर आणि जिन्सी पोलीस ठाण्याचे निरीक्षक गणेश ताठे यांच्या संयुक्त पथकाने आरोपींच्या घरावर छापा टाकून दोघांनाही अटक केली.
२५ हून अधिक गुन्ह्यांचा आरोपी; वाढदिवसाच्या आधीच पोलिसांनी पकडले
तपासात असेही समोर आले की, मुख्य आरोपी मुक्या साळवे याच्यावर यापूर्वीच २५ हून अधिक गंभीर गुन्हे दाखल आहेत. त्याचा ३ जुलै रोजी वाढदिवस होता आणि तो आपल्या गुन्हेगार मित्रांसह गोव्यात क्रूझवर वाढदिवस साजरा करण्याचा बेत आखत होता. यासाठी आवश्यक निधी उभारण्याच्या उद्देशाने आरोपींनी जालना रोड परिसरात लुटमारीचे प्रकार सुरू केल्याची माहिती पोलिसांनी दिली. मात्र, वाढदिवसाच्या अवघ्या एक दिवस आधीच पोलिसांनी त्याच्या मुसक्या आवळत त्याचा हा बेत उधळून लावला.
या संपूर्ण घटनेनंतर शहर पोलिसांच्या आणि विशेषतः मुकुंदवाडी पोलीस ठाण्याच्या कार्यपद्धतीबाबतही प्रश्न उपस्थित केले जात असून, या प्रकरणाचा पुढील तपास सुरू आहे.
