अडीच दिवसांत आरोपीला अटक; चोरीचा मुद्देमाल जप्त
कन्हान (नागपूर) : कन्हान पोलीस ठाण्याच्या हद्दीतील धरमनगर येथे झालेल्या घरफोडी प्रकरणाचा अडीच दिवसांत उलगडा करत कन्हान पोलिसांनी एका आरोपीला कामठी येथून अटक केली. आरोपीच्या ताब्यातून सोन्या-चांदीचे दागिने आणि एक दुचाकी असा मुद्देमाल जप्त करण्यात आला आहे.
प्राप्त माहितीनुसार, दि. 27 जुलै 2026 रोजी धरमनगर, कन्हान येथील एका घराचे मुख्य दरवाजाचे कुलूप तोडून अज्ञात चोरट्याने घरात प्रवेश केला. घरातील कपाटात ठेवलेले जुने वापरते सोन्या-चांदीचे दागिने (किंमत 49 हजार रुपये) तसेच 11 हजार रुपये रोख, असा एकूण 60 हजार रुपयांचा ऐवज चोरी करून नेण्यात आला.
फिर्यादीच्या तक्रारीवरून कन्हान पोलीस ठाण्यात भारतीय न्याय संहिता कलम 331(3), 331(4) व 305(अ) अन्वये गुन्हा दाखल करण्यात आला.
तपासादरम्यान घटनास्थळाचा पंचनामा, रेकॉर्डवरील गुन्हेगारांची पडताळणी तसेच गुप्त माहितीच्या आधारे पोलिसांनी शोधमोहीम राबवली. सापळा रचून आकाश (दादू) यशवंत गराडे (वय 27), रा. धरमनगर, कन्हान याला कामठी येथून ताब्यात घेण्यात आले.
चौकशीत आरोपीने गुन्ह्याची कबुली दिल्यानंतर त्याच्याकडून 49 हजार रुपयांचे सोन्या-चांदीचे दागिने तसेच एक दुचाकी असा मुद्देमाल जप्त करण्यात आला.
ही कारवाई कन्हानच्या वरिष्ठ पोलीस निरीक्षक वैजयंती मंडवधरे यांच्या मार्गदर्शनाखाली सपोनि गिरिधर पेंदोर, पोहवा हरीष सोनभद्रे, पो.शि. अश्विन गजभिये व जीवन विघे यांनी केली. या पथकाने घरफोडीचा गुन्हा अल्पावधीत उघडकीस आणत आरोपीला अटक करण्यात यश मिळविले.
