परतवाडा पोलिसांच्या डी.बी. पथकाची धडाकेबाज कारवाई
भाविकांच्या श्रद्धास्थानाची सुरक्षा अबाधित ठेवण्याचा पोलिसांचा निर्धार
परतवाडा (Temple Donation Box) : केदारनगर देवमाळी येथील श्री गजानन महाराज मंदिरातील दानपेटी फोडून रोकड लंपास करण्यासह मोटारसायकल चोरीच्या घटनांचा परतवाडा पोलिसांच्या डी.बी. पथकाने छडा लावला आहे. गोपनीय माहितीच्या आधारे केलेल्या तपासात एका विधीसंघर्षग्रस्त बालकास ताब्यात घेऊन चौकशी केली असता त्याच्याकडून मंदिरातील चोरीची रक्कम तसेच चोरीच्या दोन मोटारसायकली हस्तगत करण्यात पोलिसांना यश आले. या कारवाईमुळे चोरीचे दोन गुन्हे उघडकीस आले असून एकूण ८४ हजार ५०० रुपयांचा मुद्देमाल पोलिसांनी जप्त केला आहे.
दिनांक १९ ऑगस्ट रोजी केदारनगर देवमाळी येथील रहिवासी श्रीकृष्ण बाबुराव पोटे यांनी परतवाडा पोलीस ठाण्यात तक्रार दाखल केली होती. त्यांच्या तक्रारीनुसार, १८ ऑगस्ट रोजी रात्री शेतातून मोटारसायकलने घरी आल्यानंतर त्यांनी वाहन घरासमोर उभे केले होते. दुसऱ्या दिवशी सकाळी उठून पाहिले असता मोटारसायकल गायब असल्याचे त्यांच्या निदर्शनास आले.
दरम्यान, (Temple Donation Box) घरासमोरच असलेल्या श्री गजानन महाराज मंदिरातील दानपेटीही फोडण्यात आल्याचे समोर आले. दानपेटीतील सुमारे ५ ते ६ हजार रुपयांची रोकड चोरीला गेल्याचे आढळून आले. एकाच परिसरात मोटारसायकल तसेच मंदिरातील दानपेटी फोडून चोरी झाल्याने परिसरात खळबळ उडाली होती. या प्रकरणी परतवाडा पोलीस ठाण्यात गुन्हा क्रमांक ५८१/२०२६ अन्वये भारतीय न्याय संहितेच्या कलम ३०३(२), ३०५ नुसार गुन्हा दाखल करण्यात आला.
गोपनीय माहितीने तपासाला मिळाली दिशा
गुन्ह्याचा तपास सुरू असताना परतवाडा पोलीस ठाण्याच्या डी.बी. पथकाला या चोरीमागे एका विधीसंघर्षग्रस्त बालकाचा सहभाग असल्याची गोपनीय माहिती मिळाली. पोलिसांनी तातडीने तपासाची चक्रे फिरवत संबंधित बालकास त्याच्या पालकांच्या उपस्थितीत ताब्यात घेतले. चौकशीदरम्यान त्याने केदारनगर देवमाळी येथील गजानन महाराज मंदिराच्या दानपेटीतून ५ हजार रुपये, श्रीकृष्ण पोटे यांच्या घरासमोर उभी असलेली मोटारसायकल तसेच यापूर्वी आणखी एक मोटारसायकल चोरी केल्याची माहिती दिली.
पोलिसांनी त्याच्याकडून चोरीच्या दोन मोटारसायकली आणि मंदिरातील चोरीची रोकड असा एकूण ८४ हजार ५०० रुपयांचा मुद्देमाल जप्त केला. या कारवाईमुळे परतवाडा पोलीस ठाण्यातील गुन्हा क्रमांक ५८१/२०२६ तसेच गुन्हा क्रमांक ५६८/२०२६ असे दोन चोरीचे गुन्हे उघडकीस आले आहेत.
भाविकांच्या श्रद्धास्थानाला पोलिसांचे संरक्षण
मंदिरातील दानपेटी फोडून चोरी झाल्याने भाविकांमध्ये चिंता निर्माण झाली होती. मात्र, घटनेनंतर अवघ्या काही काळात पोलिसांनी तपासाची दिशा निश्चित करून चोरीचा छडा लावल्याने भाविकांमध्ये समाधान व्यक्त होत आहे. भाविकांची श्रद्धा, मंदिरांची सुरक्षितता आणि परिसरातील नागरिकांच्या मालमत्तेचे संरक्षण यासाठी पोलिसांची सतर्कता कायम असल्याचे या कारवाईतून अधोरेखित झाले आहे. या प्रकरणाचा पुढील तपास पोलीस हवालदार सुधीर राऊत करीत आहेत.
पोलिसांची कामगिरी
ही (Temple Donation Box) उल्लेखनीय कारवाई अमरावती ग्रामीणचे पोलीस अधीक्षक निकेतन कदम, अपर पोलीस अधीक्षक दत्ता तोटेवाड, धारणी उपविभागीय पोलीस अधिकारी तथा अचलपूर अतिरिक्त प्रभाराचे माधवराव गरुड आणि परतवाडा पोलीस ठाण्याचे ठाणेदार अजय आकरे यांच्या मार्गदर्शनाखाली करण्यात आली.
कारवाईत सहायक पोलीस निरीक्षक सलीम शेख, पोलीस हवालदार सचिन होले, सुधीर राऊत, पोलीस कॉन्स्टेबल चंद्रशेखर वानखडे, जितेश बाबील, घनश्याम किरोले, सचिन कोकणे, शुभम शर्मा तसेच चालक पोलीस कॉन्स्टेबल प्रविण चकोर यांनी सहभाग घेतला. पोलिसांच्या तत्पर तपासामुळे मंदिरातील चोरीसह मोटारसायकल चोरीचे दोन गुन्हे उघडकीस येऊन चोरीचा मुद्देमाल परत मिळाल्याने परतवाडा पोलिसांच्या डी.बी. पथकाच्या कामगिरीचे नागरिक व भाविकांकडून कौतुक होत आहे.
