चाकूचा धाक दाखवून महिलेच्या अंगावरील एक लाख तीस हजाराचे दागिने लंपास

चाकूर (Chakur Jewelry stolen) : लातूर जिल्ह्य़ातील चाकूर येथे घरासमोर अंगणात साफसफाई करत असलेल्या महिलेच्या अंगावरील सोन्याचे दागिने चाकूचा धाक दाखवून तीन अनोळखी व्यक्तींनी जबरदस्तीने काढून घेतल्याची घटना रविवारी (दि. २३) पहाटेच्या सुमारास चाकूर शहरातील बोथी रोड परिसरात घडली. या घटनेमुळे परिसरात खळबळ उडाली असून, पोलिसांनी अज्ञात तिघांविरुद्ध जबरी चोरीचा गुन्हा दाखल केला आहे.

कल्पना नंदकुमार आक्कानवरु (वय ५०, रा. बोथी रोड, पोस्ट ऑफिसजवळ, चाकूर) या रविवारी पहाटे सुमारे ५.२६ वाजता आपल्या घरासमोरील अंगणात झाडून काढत होत्या. त्यावेळी विनानंबर प्लेटच्या युनिकॉर्न मोटारसायकलवरून तीन अनोळखी इसम तेथे आले. तिघांनी संगनमत करून चाकूचा धाक दाखवत (Chakur Jewelry stolen) त्यांच्या अंगावरील सोन्याचे दागिने जबरदस्तीने काढून घेतले आणि मोटारसायकलवरून पसार झाले.

या (Chakur Jewelry stolen) घटनेत महिलेच्या गळ्यातील सुमारे एक तोळा वजनाचे सोन्याचे मणी मंगळसूत्र, कानातील सुमारे एक तोळा दोन ग्रॅम वजनाच्या सोन्याच्या साखळ्या, फुले व सरपाळे तसेच पाच ग्रॅम वजनाची सोन्याची अंगठी असा एकूण अंदाजे १ लाख ३० हजार रुपये किमतीचा ऐवज चोरीस गेला आहे.

घटनेची माहिती मिळताच चाकूर पोलीस स्टेशनचे पोलीस निरीक्षक बालाजी भंडे यांच्यासह पोलीस कर्मचारी घटनास्थळी दाखल होऊन या घटनेचा पोलिसांनी गुन्हा दाखल करून तपास सुरू केला आहे. पोलीस उपनिरीक्षक आर. टी. चव्हाण हे अधिक तपास करत असून अज्ञात आरोपींचा शोध घेण्यासाठी पोलिसांकडून तपासाची चक्रे फिरविण्यात येत आहेत. आरोपींची ओळख अद्याप पटलेली नसून चोरीस गेलेला ऐवजही मिळालेला नाही.