अनंत चतुर्दशीला चिंतामणी गणपतीच्या दर्शनासाठी आलेल्या शेवटपर्यंतच्या भाविकांनाही महाप्रसादाचा लाभ
हिंगोली : शहरातील नवसाला पावणारा आणि जगभरात प्रसिद्ध असलेल्या श्री विघ्नहर्ता चिंतामणी गणपतीच्या दर्शनासाठी अनंत चतुर्दशीच्या निमित्ताने राज्यभरातून लाखो भाविक हिंगोली शहरात दाखल झाले होते. दूरवरून आलेल्या या भाविकांच्या सेवेसाठी राजस्थान व्यायाम शाळा संचालित ‘श्री राजस्थान बाल गणेश मंडळा’च्या वतीने बालाजी मंदिर परिसरात भव्य अन्नदान कार्यक्रमाचे आयोजन करण्यात आले. या महाप्रसादाचा लाखो भाविकांनी भक्तिभावाने आणि शिस्तबद्ध वातावरणात लाभ घेतला.
या सामाजिक आणि धार्मिक उपक्रमाला आमदार संतोषराव बांगर यांनी प्रत्यक्ष भेट देऊन पाहणी केली. तसेच मंडळाच्या वतीने राबविण्यात आलेल्या अन्नदान उपक्रमाचे त्यांनी मनापासून कौतुक केले. यावेळी भाजपा युवा जिल्हाध्यक्ष शिवाजी तानाजीराव मुटकुळे, युवा शिवसेना जिल्हाप्रमुख राम कदम, शिवसेना गटनेते नगरसेवक श्रीराम बांगर आणि नगरसेवक गणेश बांगर उपस्थित होते. त्यांनीही आयोजकांच्या कार्याचे कौतुक केले.
अन्नदान कार्यक्रम यशस्वी करण्यासाठी मंडळाचे पदाधिकारी तसेच विविध क्षेत्रांतील मान्यवरांनी विशेष पुढाकार घेतला. यामध्ये कपिल खंडेलवाल, गोविंद खंडेलवाल, उद्योजक अनिल नैनवाणी, शासकीय कंत्राटदार मयूर कयाल, जुगल खंडेलवाल, सुमित चौधरी, भरत चौधरी, श्याम खंडेलवाल, मुरली हेडा, मधुर भन्साळी, राघव खंडेलवाल, जुगल खंडेलवाल आदी मान्यवरांनी उपस्थित राहून कार्यक्रमात सहभाग नोंदवला.
चिंतामणी गणपतीच्या दर्शनासाठी राज्यभरातून आलेल्या भाविकांनी महाप्रसादाचा आस्वाद घेतल्यानंतर समाधान व्यक्त केले. आयोजकांनी केलेली प्रसादाची व्यवस्था, स्वच्छता आणि आदरतिथ्य कौतुकास्पद असल्याचे भाविकांनी सांगितले.
राजस्थान व्यायाम शाळा आणि राजस्थान बाल गणेश मंडळाच्या वतीने राबविण्यात आलेल्या या सामाजिक व धार्मिक उपक्रमाचे हिंगोली शहरासह भाविकांमध्ये कौतुक होत आहे.
