७ दिवसात स्वतःहून अतिक्रमण हटविण्याचे आदेश!
मानोरा (Maharashtra Encroachment) : शहरातून जाणाऱ्या आर्णी-अकोला या मार्गाच्या दोन्ही बाजूंना अतिक्रमण करून व्यवसाय करणारे दुकानदार तसेच घरमालकांना राष्ट्रीय महामार्ग विभाग, अमरावती यांच्या वतीने अतिक्रमण हटविण्याच्या नोटीसा २७ ऑगस्ट रोजी बजावण्यात आल्या आहेत. या नोटिसांमुळे शहरातील व्यापारी आणि नागरिकांमध्ये खळबळ उडाली असुन अतिक्रमण धारकांनी लोकप्रतिनिधी यांच्याकडे अतिक्रमण वाचविण्यासाठी धावपळ सुरू केली आहे.
राष्ट्रीय महामार्ग विभागाच्या कार्यकारी अभियंत्यांनी बजावलेल्या नोटीसमध्ये या मार्गाच्या हद्दीत सक्षम प्राधिकरणाची परवानगी न घेता बांधकाम करण्यात आल्याचे नमूद करण्यात आले आहे. नोटीस मिळाल्यापासून ७ दिवसांच्या आत संबंधितांनी अतिक्रमण स्वतःहून हटवावे, असे निर्देश देण्यात आले आहे. (Maharashtra Encroachment) नोटीस प्राप्त झालेल्या अतिक्रमण धारकांनी आपले अतिक्रमण वाचविण्यासाठी लोकप्रतिनिधी यांच्याकडे धाव घेत असुन त्यांचे धाबे दणाणले आहे. तसेच तालुका ठिकाणी मानोरा शहरातील अतिक्रमण हटवून जनतेची शहरात होणारी कोंडी सोडविण्याची मागणी आम जनतेतून होत आहे.
