सर्वोच्च न्यायालयातील याचिकेवर ३१ ऑगस्टला सुनावणी; मानोरामध्ये राजकीय खळबळ
मानोरा (MP Sanjay Deshmukh) : शिवसेना उद्धव बाळासाहेब ठाकरे पक्षातून बाहेर पडून शिंदे गटात प्रवेश केलेल्या खा . संजय देशमुख यांच्यासह अन्य ५ खासदारांच्या बंडखोरी व चिन्ह चोरी करणाच्या मुद्द्यावरून महाराष्ट्रात राजकीय वातावरण पुन्हा तापले आहे. खा. देशमुख (MP Sanjay Deshmukh) यांच्या निवासस्थानी पोहचून उबाठाच्या पदाधिकाऱ्यांकडून नोटीस बजावण्यात आल्याने मानोरा तालुक्यातील राजकीय गोटात चर्चेला उधाण आले आहे.
शिवसेना उद्धव बाळासाहेब ठाकरे पक्षातून बाहेर पडून शिंदे गटात सहभागी झालेल्या सहा खासदारांविरोधात खासदार अरविंद सावंत यांनी सर्वोच्च न्यायालयात याचिका दाखल केली आहे. या याचिकेत बंडखोरी तसेच पक्षचिन्हाच्या मुळालाही आव्हान देण्यात आले आहे. या प्रकरणाची पुढील सुनावणी ३१ ऑगस्ट रोजी होणार आहे. न्यायालयाच्या नोटीसा खासदार संजय देशमुख यांना मिळाल्या नसल्याचे कारण पुढे येऊ नये, यासाठी उबाठा गटाच्या पदाधिकाऱ्यांनी थेट त्यांच्या निवासस्थानी जाऊन नोटीस सुपूर्द केली.
खासदार देशमुख यांच्या निवासस्थानी उपस्थित असलेल्या चैतन्य धोरे यांनी नोटीस स्वीकारून त्याची पोचपावती दिली. यावेळी खासदार अरविंद सावंत यांचे स्वीय सहाय्यक दीपक गोगल, जिल्हाप्रमुख प्रवीण शिंदे इतर उबाठाचे पदाधिकारी उपस्थित होते. दरम्यान, सर्वोच्च न्यायालयातील या प्रकरणाच्या पार्श्वभूमीवर उबाठा गटाकडून थेट खासदारांच्या निवासस्थानी नोटीस देण्यात आल्याने आगामी सुनावणीकडे राजकीय वर्तुळाचे लक्ष लागले आहे. लोकसभा मतदार संघातील मानोरा तालुक्यातील राजकीय गोटात खळबळ उडाली आहे.
लोकसभेच्या निवडणुकीत खासदार संजय देशमुख (MP Sanjay Deshmukh) यांनी आईची शपथ घेऊन पक्ष बदलणार नाही, मी उद्धव साहेब सोबतच राहील. इतरासारखी गद्दारी करणार नाही. असे प्रचार दौऱ्यात भाषणात वक्तव्य केले. परंतु उद्धव साहेबांच्या नावावर जनतेची मते घेऊन निवडून आल्यानंतर २ वर्षातच शिवसेना उबाठाची साथ सोडून गद्दारीचा खरा जो रंग आहे तो दाखविला आणि बेइमानी केली.
-रविंद्र पवार, उबाठा शिवसेना तालुका प्रमुख, मानोरा
