रिसोड (Risod-Washim Accident) : रिसोड-वाशिम मार्गावरील ग्राम सवड नजीक साई धाब्याजवळ मंगळवारी (14 जुलै) सायंकाळी सुमारे 6 वाजताच्या सुमारास झालेल्या भीषण दुचाकी अपघातात एका व्यक्तीचा जागीच मृत्यू झाला, तर दुसरा गंभीर जखमी झाला आहे.मृत व्यक्तीचे नाव राजेश गुलाबराव हाडे (वय 45) असून, गंभीर जखमीचे नाव समाधान हिम्मतराव निकम (वय 48) असे आहे. दोघेही गोहगाव हाडे, ता. रिसोड, जि. वाशिम येथील रहिवासी आहेत.
मिळालेल्या प्राथमिक माहितीनुसार, दोघेही दुचाकीवरून वाशिमहून रिसोडकडे येत असताना साई धाब्याजवळ त्यांच्या दुचाकीसमोर अचानक बैलगाडी आल्याने चालकाचे वाहनावरील नियंत्रण सुटले आणि भीषण अपघात झाला. या (Risod-Washim Accident) अपघातात राजेश हाडे यांचा मृत्यू झाला, तर समाधान निकम गंभीर जखमी झाले असून त्यांच्यावर उपचार सुरू आहेत. जखमी समाधान निकम यांनी प्राथमिक माहितीत बैलगाडी अचानक समोर आल्याने अपघात झाल्याचे सांगितले आहे. अधिकृत तपासानंतर अपघाताचे नेमके कारण स्पष्ट होणार आहे.
