मुंबई (Metro Line 9) : मुंबई आणि उपनगरातील सार्वजनिक वाहतुकीसाठी आजचा दिवस महत्त्वाचा ठरत आहे. बहुप्रतिक्षित मेट्रो 9 मार्गिका अखेर प्रवाशांसाठी खुली होत असून, दहिसर ते मिरा-भाईंदर परिसरातील प्रवास अधिक वेगवान आणि सोयीस्कर होणार आहे. काशीगाव ते गुंदवली (अंधेरी) या दरम्यानची सेवा आजपासून सुरू होत असल्याने प्रवाशांना मोठा दिलासा मिळणार आहे.
प्रवाशांच्या सोयीचा विचार करून मेट्रो प्रशासनाने वेळापत्रक आखले आहे. पहिली गाडी पहाटे 5.50 वाजता काशीगावहून सुटेल, तर शेवटची सेवा रात्री 11 वाजेपर्यंत उपलब्ध राहणार आहे. गर्दीच्या वेळेत सहा मिनिटांच्या अंतराने गाड्या धावतील, तर इतर वेळात आठ ते दहा मिनिटांनी सेवा दिली जाईल.
या मार्गावरील प्रमुख स्थानकांमध्ये दहिसर पूर्व (कनेक्टिव्हिटी पॉईंट), पांडुरंगवाडी, मिरागाव, काशीगाव, साईबाबा नगर, मेडतिया नगर, शहीद भगत सिंग गार्डन आणि सुभाषचंद्र बोस स्टेडियम यांचा समावेश आहे.
दरम्यान, मेट्रो लाईन 2B च्या पहिल्या टप्प्याचीही माहिती समोर आली आहे. सुमारे 5.38 किमी लांबीच्या या टप्प्यात पहिली मेट्रो सकाळी 6 वाजता सुटेल, तर शेवटची सेवा रात्री 10.15 ते 10.30 दरम्यान असेल. या मार्गावर साधारण 9 मिनिटे 30 सेकंदांच्या अंतराने गाड्या धावतील आणि दिवसाभरात एकूण 209 फेऱ्या होणार आहेत.
या नव्या सेवेमुळे रस्त्यावरील वाहतूक कोंडी कमी होण्यास मदत होईल आणि प्रवासाचा वेळही लक्षणीयरीत्या घटेल. विशेषतः काशीगाव आणि मिरा रोड परिसरातील प्रवासी आता मेट्रो 7 च्या माध्यमातून थेट अंधेरीपर्यंत सहज पोहोचू शकतील. त्यामुळे खासगी वाहनांचा वापर कमी होऊन पर्यावरणीय प्रदूषणातही घट होण्याची अपेक्षा आहे.
मुंबईतील मेट्रो जाळे झपाट्याने विस्तारत असून, शहरात विविध मार्गिका कार्यान्वित किंवा उभारणीच्या टप्प्यात आहेत. वर्सोवा-घाटकोपर (लाईन 1), दहिसर ते अंधेरी (लाईन 2A), डी.एन. नगर ते मंडाले (लाईन 2B), कफ परेड ते आरे (लाईन 3), वडाळा ते कासारवडवली (लाईन 4), ठाणे ते कल्याण (लाईन 5), लोखंडवाला ते विक्रोळी (लाईन 6), दहिसर ते गुंदवली (लाईन 7), गुंदवली ते विमानतळ (लाईन 7A), दहिसर ते मीरा-भाईंदर (लाईन 9) अशा अनेक मार्गिका मुंबईच्या वाहतुकीला नवे रूप देत आहेत. भविष्यात गायमुख-मीरा रोड (लाईन 10), वडाळा-सीएसएमटी (लाईन 11) आणि कल्याण-तळोजा (लाईन 12) या मार्गिकाही महत्त्वपूर्ण ठरणार आहेत.
