सांगली (Mother Murder Case) : सांगली जिल्ह्यात आई–मुलाच्या पवित्र नात्याला काळिमा फासणारी अत्यंत धक्कादायक घटना उघडकीस आली आहे. मिरज तालुक्यातील मानमोडी गावात 28 वर्षीय मुलाने स्वतःच्या आईचा गळा दाबून खून केल्याची घटना समोर आली असून, या प्रकारामुळे संपूर्ण परिसर हादरला आहे. कुपवाड पोलिसांनी तातडीने कारवाई करत आरोपी मुलाला काही तासांतच अटक केली आहे.
या घटनेत मृत्यू झालेल्या महिलेचे नाव संगीता जीवन झेंडे (वय 51) असे आहे, तर आरोपी मुलगा जगदीश जीवन झेंडे (वय 28) असा आहे.
कुटुंबातच वादाची ठिणगी
मिळालेल्या माहितीनुसार, झेंडे कुटुंब मानमोडी येथील झेंडा मळा परिसरात वास्तव्यास आहे. बुधवारी सायंकाळी कुटुंबप्रमुख जीवन झेंडे हे नेहमीप्रमाणे रात्रपाळीसाठी कामावर गेले होते. घरात आई संगीता आणि मुलगा जगदीश असे दोघेच होते. यावेळी घरगुती कारणांवरून दोघांमध्ये वाद झाला.
जगदीशचा विवाह झालेला असून त्याची पत्नी सोनाली सध्या माहेरी राहत आहे. तिला पुन्हा घरी आणण्याच्या मुद्द्यावरून आई–मुलामध्ये वाद झाल्याची माहिती समोर येत आहे.
अनैतिक संबंधांचा वाद ठरला कारणीभूत
दरम्यान, जगदीशचे गावातील एका विवाहित महिलेशी अनैतिक संबंध असल्याचेही समोर आले आहे. त्या महिलेला घरी आणण्याचा त्याचा हट्ट होता. मात्र, या गोष्टीला आई संगीता यांचा कडाडून विरोध होता. बुधवारी रात्री याच कारणावरून वाद अधिक तीव्र झाला आणि त्याचे रूपांतर हिंसाचारात झाले.
संतापाच्या भरात घेतला टोकाचा निर्णय
वाद चिघळल्यानंतर संतापाच्या भरात जगदीशने अत्यंत टोकाचे पाऊल उचलले. घरात कोणी नसल्याचा फायदा घेत त्याने आईचे नाक, तोंड आणि गळा दाबून तिची हत्या केली. घटनेनंतर तो तातडीने घरातून फरार झाला.
सकाळी उघडकीस आला प्रकार
गुरुवारी सकाळी रात्रपाळीवरून परतलेल्या जीवन झेंडे यांनी घरात प्रवेश केला असता पत्नी संगीता यांचा मृतदेह पाहून त्यांना जबर धक्का बसला. त्यांनी तत्काळ याची माहिती पोलिसांना दिली.
पोलिसांची झटपट कारवाई
घटनेची माहिती मिळताच कुपवाड पोलीस ठाण्याचे सहायक पोलीस निरीक्षक आनंदराव घाटगे यांच्या नेतृत्वाखालील पथक तातडीने घटनास्थळी दाखल झाले. पंचनामा आणि प्राथमिक तपास पूर्ण करून पोलिसांनी आरोपीचा शोध सुरू केला.
तपासाची दिशा स्पष्ट होताच पोलिसांनी काही तासांतच आरोपी जगदीश झेंडे याला ताब्यात घेतले. पोलीस ठाण्यात आणून कसून चौकशी केल्यानंतर त्याने गुन्ह्याची कबुली दिली, अशी माहिती पोलिसांकडून देण्यात आली.
गुन्हा दाखल; तपास सुरू
या प्रकरणी मृत संगीता झेंडे यांचे भाऊ बजरंग काशीद यांनी कुपवाड पोलीस ठाण्यात फिर्याद दिली आहे. त्यानुसार आरोपीविरुद्ध खुनाचा गुन्हा दाखल करण्यात आला असून पुढील तपास सुरू आहे.
परिसरात संताप आणि हळहळ
पोटच्या मुलानेच आईचा जीव घेतल्याची घटना समोर आल्याने मानमोडी परिसरासह पंचक्रोशीत संताप आणि हळहळ व्यक्त केली जात आहे. आई–मुलाच्या नात्यावरील विश्वासाला तडा देणाऱ्या या घटनेने समाजमन सुन्न झाले आहे.
