कळमनुरी (Street Light Andolan) : शहरातील कोट्यवधी रुपये खर्च करून उभारण्यात आलेली स्ट्रीट लाईट व्यवस्था पुन्हा एकदा बंद पडल्याने नागरिकांना मोठ्या अडचणींचा सामना करावा लागत आहे. अनेक दिवसांपासून शहरातील प्रमुख रस्ते आणि परिसर अंधारात असल्याने नागरिकांमध्ये नाराजीचे वातावरण निर्माण झाले आहे. यापूर्वीही शहरातील स्ट्रीट लाईट बंद असल्याच्या निषेधार्थ वंचित बहुजन आघाडीच्या वतीने कॅन्डल आंदोलन करण्यात आले होते. त्यानंतर नगरपरिषद प्रशासनाने तातडीने दखल घेत स्ट्रीट लाईट सुरू केले होते मात्र, पुन्हा एकदा संपूर्ण शहरातील स्ट्रीट लाईट बंद असल्याचा आरोप वंचित बहुजन युवक आघाडीने केला आहे.
रात्रीच्या वेळी अंधारामुळे नागरिक, महिला, विद्यार्थी तसेच ज्येष्ठ नागरिकांना ये-जा करताना अडचणी निर्माण होत असून अपघात व अनुचित घटनांची भीती वाढली आहे. शहरातील सार्वजनिक सुरक्षेचा प्रश्नही यामुळे ऐरणीवर आला आहे. या पार्श्वभूमीवर नगरपरिषद प्रशासनाने तातडीने दखल घेऊन शहरातील (Street Light Andolan) स्ट्रीट लाईट सुरू कराव्यात, अशी मागणी वंचित बहुजन युवक आघाडीने केली आहे.
येत्या दोन दिवसांत स्ट्रीट लाईट सुरू न झाल्यास नगरपरिषदेसमोर तीव्र आंदोलन छेडण्यात येईल, असा इशारा वंचित बहुजन युवक आघाडीचे तालुकाध्यक्ष मोहम्मद असलम यांनी दिला आहे. दरम्यान, नागरिकांनीही शहरातील बंद पडलेल्या स्ट्रीट लाईटची समस्या तातडीने सोडविण्याची मागणी केली असून नगरपरिषद प्रशासन यावर काय भूमिका घेते, याकडे सर्वांचे लक्ष लागले आहे.
