विधान भवनासह मंत्रालय, मेट्रो स्टेशन आणि स्टॉक एक्सचेंजलाही लक्ष्य करण्याचा उल्लेख
पोलिसांची तातडीने तपासणी
मुंबई (Mumbai Vidhan Bhavan) : राज्याच्या विधिमंडळाचे कामकाज सुरू असतानाच मुंबईतील (Mumbai Vidhan Bhavan) विधान भवनाला पुन्हा एकदा बॉम्बस्फोटाची धमकी देणारा ई-मेल प्राप्त झाल्याने सुरक्षा यंत्रणा सतर्क झाली. शुक्रवारी सकाळी 8 वाजून 11 मिनिटांनी हा धमकीचा ई-मेल प्राप्त झाल्यानंतर पोलिसांनी तातडीने संपूर्ण परिसरात कसून तपासणी सुरू केली. मात्र सखोल शोधमोहीम पूर्ण झाल्यानंतर हा ई-मेल बनावट (Hoax) असल्याचे स्पष्ट झाले.
सूत्रांकडून मिळालेल्या माहितीनुसार, ई-मेलमध्ये शुक्रवारी दुपारी 1 वाजून 11 मिनिटांनी बॉम्बस्फोट घडवून आणण्याचा इशारा देण्यात आला होता. (Mumbai Vidhan Bhavan) विधान भवनाबरोबरच मंत्रालय, मेट्रो स्टेशन आणि स्टॉक एक्सचेंज यांचाही संभाव्य लक्ष्यांमध्ये उल्लेख करण्यात आला होता. सुट्टीचा दिवस असूनही पोलिसांनी कोणतीही जोखीम न पत्करता निर्धारित सुरक्षा प्रक्रियेचे (SOP) पालन करत संपूर्ण विधिमंडळ परिसराची सखोल तपासणी केली. बॉम्ब शोधक पथके आणि संबंधित सुरक्षा यंत्रणांनी परिसराची पाहणी केल्यानंतर कोणतीही संशयास्पद वस्तू आढळली नाही.
यापूर्वीही (Mumbai Vidhan Bhavan) विधिमंडळाचे अधिवेशन सुरू असताना अशाच प्रकारचा धमकीचा ई-मेल प्राप्त झाला होता. आता पुन्हा अधिवेशनाच्या काळातच अशी धमकी आल्याने सुरक्षा व्यवस्थेबाबत चिंता व्यक्त केली जात आहे. वारंवार अशा प्रकारचे बनावट ई-मेल पाठवून भीतीचे वातावरण निर्माण करण्याच्या घटनांकडे तपास यंत्रणांनी गांभीर्याने लक्ष केंद्रित केले आहे.
