पुणे (NEET Exam Scam) : NEET UG 2026 परीक्षेतील कथित पेपर लीक प्रकरणाने देशभरात मोठी चर्चा निर्माण केली असताना, केंद्रीय अन्वेषण विभागाने (CBI) या प्रकरणात महत्त्वाची कारवाई करत लातूर येथील ‘रेणुकाई करिअर सेंटर’ (RCC) चे संचालक शिवराज रघुनाथ मोटेगावकर यांना पुण्यातून अटक केली आहे. ही कारवाई रविवारी (१७ मे २०२६) सायंकाळी ७:१५ वाजता करण्यात आली.
सीबीआयच्या माहितीनुसार, तपासादरम्यान असे समोर आले आहे की २३ एप्रिल २०२६ रोजी, म्हणजे परीक्षेपूर्वीच, आरोपीने NEET UG परीक्षेची प्रश्नपत्रिका आणि उत्तरे प्राप्त केली होती. पुढे १४ मे रोजी लातूर येथील त्यांच्या निवासस्थानी छापेमारी करताना मोबाईलमध्ये परीक्षेशी संबंधित लीक झालेला मजकूर आढळून आला. यामुळे ते एका संघटित पेपर लीक टोळीशी संबंधित असल्याचा संशय अधिक बळावला आहे.
तपासात आणखी धक्कादायक बाब समोर आली असून, परीक्षा पार पडल्यानंतर पुरावे नष्ट करण्याच्या हेतूने प्रश्नपत्रिका नष्ट करण्यात आल्याचे स्पष्ट झाले आहे. तसेच, ज्या विद्यार्थ्यांना या लीकचा लाभ मिळाला, त्यांची नावे उघड करण्यास आरोपीने टाळाटाळ केल्याचेही तपास यंत्रणेने नमूद केले आहे. संबंधित प्रश्नपत्रिका अनेक व्यक्ती आणि विद्यार्थ्यांपर्यंत पोहोचवल्याचा संशयही व्यक्त करण्यात आला आहे.
गंभीर कायद्यांनुसार गुन्हा दाखल
या प्रकरणात आरोपीवर भारतीय न्याय संहिता (BNS), भ्रष्टाचार प्रतिबंधक कायदा (PC Act) तसेच सार्वजनिक परीक्षा (अनुचित प्रकारांना प्रतिबंध) कायदा, २०२४ अंतर्गत गुन्हे दाखल करण्यात आले आहेत. त्यांच्यावर फसवणूक, गुन्हेगारी कट, तसेच परीक्षेतील गैरप्रकारांना चालना दिल्याचे गंभीर आरोप ठेवण्यात आले आहेत.
या अटकेनंतर लातूरसह राज्यातील शैक्षणिक क्षेत्रात खळबळ निर्माण झाली असून, या प्रकरणाची व्याप्ती किती मोठी आहे आणि यात आणखी कोणाचा सहभाग आहे, याचा सखोल तपास सीबीआयकडून सुरू आहे.
