फडके हौद, शिवरकर रोडसह विविध भागांत निर्बंध; गर्दीनुसार वाहतूक एकेरी किंवा पूर्ण बंद करण्याचा निर्णय
श्रीकृष्ण जयंती आणि दहीहंडी उत्सवाच्या पार्श्वभूमीवर पुणे शहरातील वाहतूक व्यवस्थेत मोठे बदल करण्यात आले आहेत. ४ आणि ५ सप्टेंबर रोजी शहरातील विविध भागांत मोठ्या प्रमाणावर गर्दी होण्याची शक्यता असल्याने वाहतूक शाखेकडून आवश्यकतेनुसार मार्गांवर निर्बंध लागू केले जाणार आहेत. काही रस्त्यांवरील वाहतूक पूर्णपणे बंद केली जाणार असून, वाहनचालकांना पर्यायी मार्गांचा वापर करावा लागणार आहे.
फडके हौद परिसरात ४ सप्टेंबर रोजी सायंकाळी ४ वाजल्यापासून गर्दी कमी होईपर्यंत वाहतुकीत बदल राहणार आहेत. जिजामाता चौक, सोन्या मारुती चौक, गणेश रोड आणि फडके हौद परिसरातील वाहनांना परिस्थितीनुसार पर्यायी मार्गाने वळविण्यात येणार आहे.
दरम्यान, ५ सप्टेंबर रोजी शिवरकर रोडवरील वाहतूकही सायंकाळी ४ वाजल्यापासून बंद करण्यात येणार आहे. या भागातून प्रवास करणाऱ्या वाहनचालकांनी संविधान चौक, साळुंखे विहार रोड आणि फ्लॉवर व्हॅली लेन या पर्यायी मार्गांचा वापर करावा, असे आवाहन करण्यात आले आहे.
याशिवाय लष्कर, वारजे, समर्थ, बंडगार्डन आणि काळेपडळ या वाहतूक विभागांच्या हद्दीतही गर्दीच्या स्थितीनुसार वाहतूक नियमन केले जाणार आहे. आवश्यकतेनुसार काही रस्त्यांवर एकेरी वाहतूक लागू केली जाईल, तर काही मार्ग पूर्णपणे बंद करून वाहनांसाठी पर्यायी रस्ते उपलब्ध करून दिले जाणार आहेत.
दहीहंडी उत्सवादरम्यान वाहतूक कोंडी टाळण्यासाठी नागरिकांनी शक्यतो सार्वजनिक वाहतुकीचा वापर करावा. तसेच वाहतूक पोलिसांकडून सूचित करण्यात आलेल्या पर्यायी मार्गांचा अवलंब करून पोलिसांना सहकार्य करावे, असे आवाहन शहर वाहतूक शाखेचे पोलीस उप आयुक्त डॉ. संदिप भाजीभाकरे यांनी केले आहे.
