रिसोड : रिसोड शहर आणि मुख्य रस्त्यांवर मोकाट जनावरे व गाई ठाण मांडून बसत असल्याने वाहतुकीस मोठा अडथळा निर्माण होत होता. या समस्येची गंभीर दखल घेत रिसोड नगर परिषदेच्या वतीने विशेष मोहीम राबवून रस्त्यावरील ढोर-गाईंना पकडून नगर परिषदेच्या कोंडवाड्यात जमा करण्यात आले आहे. या कारवाईदरम्यान नियमांचे उल्लंघन करणाऱ्या १२ निष्काळजी नागरिकांकडून दंड वसूल करण्यात आला आहे.
रस्त्यावर मोकाट सोडून दिलेल्या जनावरांमुळे वाहनधारकांना त्रास सहन करावा लागत होता, तसेच अपघातांचा धोका वाढला होता. या पार्श्वभूमीवर रिसोड नगर परिषदेचे मुख्याधिकारी सतीश शेवदा यांच्या मार्गदर्शनाखाली ही धडक मोहीम हाती घेण्यात आली.
ही कारवाई आरोग्य निरीक्षक रोहित बढेल यांच्या थेट नियंत्रणाखाली पार पडली. तसेच सफाई मुकादम नीरज नकवाल आणि शिवाजी शेलार यांच्यासह नगर परिषदेच्या कर्मचाऱ्यांनी प्रत्यक्ष रस्त्यावर उतरून मोकाट जनावरांना पकडून कोंडवाड्यात दाखल केले.
नगर परिषद प्रशासनाच्या वतीने नागरिकांना व पशुपालकांना कडक इशारा देण्यात आला आहे की, त्यांनी आपली जनावरे रस्त्यावर मोकाट सोडू नयेत. स्वतःच्या जनावरांची व्यवस्था स्वतःच्या जागेतच करावी. यापुढेही रस्त्यावर मोकाट जनावरे आढळल्यास ती जप्त करून मालकांवर अधिक कडक दंडात्मक व कायदेशीर कारवाई करण्यात येईल.
