पातूर : पातूर-अकोला महामार्गावर मंगळवारी एक भीषण दुचाकी अपघात झाला. अकोल्याहून पातूरच्या दिशेने येणारी युनिकॉर्न मोटरसायकल अचानक अनियंत्रित होऊन रस्त्याच्या कडेला कोसळली. या अपघातात मोटरसायकल चालक गंभीररीत्या जखमी झाला आहे.
चालक गंभीर जखमी
मिळालेल्या माहितीनुसार, राजेश ब्रह्मदास राठोड (वय अंदाजे, रा. राजनखेड) असे गंभीर जखमी झालेल्या बाईक चालकाचे नाव आहे. अपघात इतका भीषण होता की मोटरसायकलचे मोठे नुकसान झाले असून चालक रस्त्यावर फेकला गेल्याने त्याला गंभीर दुखापत झाली.
पोलीस आणि पत्रकारांची घटनास्थळी धाव
अपघाताची माहिती मिळताच पातूर पोलीस स्टेशनचे कर्मचारी तारासिंग राठोड, इस्माईल मुल्ला, पोलीस कॉन्स्टेबल साबे तसेच स्थानिक पत्रकार दुल्हे खान यांनी तातडीने घटनास्थळ गाठले. त्यांनी वेळेचा अपव्यय न करता जखमी चालकाला तात्काळ रुग्णवाहिकेतून (ॲम्ब्युलन्स) अकोला येथील सर्वोपचार रुग्णालयात उपचारासाठी रवाना केले.
डॉक्टरांनी जपली प्रामाणिकपणाची वीण
या कठीण प्रसंगात रुग्णवाहिकेचे डॉ. फैजान जागीरदार यांनी प्रामाणिकपणाचे उत्तम उदाहरण सादर केले. जखमी राजेश राठोड यांच्याकडे असलेले १० हजार रुपये रोख आणि त्यांचे पाकीट डॉक्टरांना सापडले. त्यांनी ही संपूर्ण रक्कम व साहित्य सुरक्षितपणे जखमीच्या नातेवाईकांच्या स्वाधीन केले.
याप्रकरणी पातूर पोलिसांनी घटनास्थळाचा पंचनामा केला असून, अपघाताचा पुढील तपास सुरू केला आहे.
