राज्यात 1.17 लाखांहून अधिक रस्ते अपघात; अपघातप्रवण ठिकाणी तातडीने उपाययोजना करण्याचे निर्देश
मुंबई (Maharashtra Road Accident) : रस्ते अपघात रोखण्यासाठी महत्त्वाची असलेली राज्य रस्ते सुरक्षा परिषदेची बैठक तब्बल तीन वर्षांनंतर पार पडली. 3 एप्रिल 2023 रोजी परिषदेची बैठक झाली होती. त्यानंतर 22 सप्टेंबर रोजी 13वी राज्य रस्ते सुरक्षा परिषद बैठक घेण्यात आली. या तीन वर्षांच्या कालावधीत राज्यात 1.17 लाखांहून अधिक रस्ते अपघात झाले असून, त्यात 50 हजार 488 जणांचा मृत्यू झाला आहे.
अपघातांची वाढती संख्या आणि त्यातून होणारी जीवितहानी लक्षात घेता रस्ते सुरक्षा उपाययोजनांची प्रभावी अंमलबजावणी करण्याचे मोठे आव्हान सरकारसमोर आहे. या (Maharashtra Road Accident) पार्श्वभूमीवर बैठकीत अपघातांचे प्रमाण आणि मृत्यूची संख्या कमी करण्यासाठी विविध उपाययोजनांवर चर्चा करण्यात आली. परिवहन मंत्री प्रताप सरनाईक यांनी अपघात रोखण्यासाठी संबंधित विभागांनी समन्वयाने काम करण्याचे निर्देश दिले. पोलीस, सार्वजनिक बांधकाम आणि आरोग्य विभागातील अधिकाऱ्यांनी परस्पर समन्वय साधून अपघातप्रवण ठिकाणे निश्चित करावीत आणि तेथे आवश्यक सुधारणा तातडीने कराव्यात, असे निर्देश देण्यात आले.
बैठकीत रस्ते सुरक्षा नियमांची प्रभावी अंमलबजावणी, (Maharashtra Road Accident) अपघातप्रवण ठिकाणांवरील सुधारणा, वाहतूक नियंत्रण तसेच अपघातग्रस्तांना तातडीने वैद्यकीय मदत उपलब्ध करून देण्याबाबतही चर्चा झाली. रस्ते सुरक्षेसाठी केवळ बैठका घेण्यापेक्षा त्यात घेतलेल्या निर्णयांची वेळेत आणि प्रभावी अंमलबजावणी होणे आवश्यक आहे. विविध विभागांमध्ये समन्वय वाढवून अपघातांचे प्रमाण कमी करण्यासाठी ठोस कृती आराखडा राबविण्यावर भर देण्यात आला.
