हिंगोली (Robbery Case) : हिंगोली व नांदेड जिल्ह्यात हत्याराचा धाक दाखवत मोबाईल व रोख रक्कम लुटणाऱ्या टोळीचा स्थानिक गुन्हे शाखा, हिंगोलीने पर्दाफाश केला आहे. पोलिसांनी दोन मुख्य आरोपींसह टोळीतील इतर चार जणांना अटक करून एकूण चार गुन्हे उघडकीस आणले आहेत.
दि. १० ते ११ मे २०२६ दरम्यान रात्री मोटारसायकलवरून आलेल्या अज्ञात चोरट्यांनी कु्रुंदा हद्दीतील भेंडेगांव रेल्वे गेटजवळ, औंढा ना. येथील विक्रम हॉटेल, हट्टा येथील एरंडेश्वर ते दारेफळ रोड तसेच नांदेड जिल्ह्यातील उस्माननगर येथे नागरिकांना अडवून हत्याराचा धाक दाखवत मोबाईल व रोख रक्कम जबरीने लुटली होती.
या घटनांनंतर पोलीस अधीक्षक डॉ. नीलाभ रोहन व अपर पोलीस अधीक्षक कमलेश मीना यांनी घटनास्थळी भेट देऊन तात्काळ तपासाचे आदेश दिले होते.
पोलीस निरीक्षक मोहन भोसले यांच्या मार्गदर्शनाखाली पोलीस उपनिरीक्षक माधव जिव्हारे व पथकाने गोपनीय माहिती व तांत्रिक तपासाच्या आधारे हा गुन्हा नांदेड येथील किसन रमेश सुर्यवंशी (रा. शिव नगर) व आदित्य उर्फ आद्या शिवाजी जाधव (रा. खोब्रागडे, गल्ली नं. २) यांनी इतर चार साथीदारांसह केल्याचे निष्पन्न केले.
दि. १५ मे रोजी पोलिसांनी दोन्ही मुख्य आरोपींना चौंडी येथून ताब्यात घेतले. चौकशीत त्यांनी हिंगोली व नांदेड जिल्ह्यात जबरी चोरीचे गुन्हे केल्याची कबुली दिली.
आरोपींकडून सॅमसंग, व्हिवो, पोको, मोटोरोला, ओप्पो कंपनीचे ७ मोबाईल, एक पल्सर मोटारसायकल व एक खंजीर असा एकूण २ लाख ४३ हजार ५०० रुपयांचा मुद्देमाल जप्त करण्यात आला आहे.
ही कारवाई पोलीस अधीक्षक डॉ. नीलाभ रोहन, अपर पोलीस अधीक्षक कमलेश मीना यांच्या मार्गदर्शनाखाली स्थानिक गुन्हे शाखेचे पोलीस निरीक्षक मोहन भोसले, पोलीस उपनिरीक्षक माधव जिव्हारे, पोलीस अंमलदार सुभाष घुगे, कोंडीबा मगरे, सतीष जाधव, विक्रम कुंदनानी, आजम प्यारेवाले, विशाल खंडागळे, किशोर सावंत, दत्ता नागरे व मारोती काकडे यांच्या पथकाने केली.
