सोशल मीडिया पोस्टमधून अनुभव केला शेअर; FDA अधिकाऱ्यांना टॅग करत कारवाईची मागणी
मुंबईतील सहार परिसरातील फाईव्ह स्टार हॉटेलमधील ‘Romano’ रेस्टॉरंटमध्ये जेवणासाठी गेलेल्या प्रसिद्ध हृदयरोगतज्ज्ञ डॉ. अशोक सेठ यांच्या टेबलवर झुरळ आढळल्याचा दावा करण्यात आला आहे. डॉ. सेठ यांनी सोशल मीडिया पोस्टद्वारे हा अनुभव शेअर केला असून, या घटनेचा व्हिडिओही सोशल मीडियावर व्हायरल होत आहे. या प्रकारामुळे उच्च दर्जाच्या हॉटेलमधील स्वच्छता आणि अन्नसुरक्षेच्या व्यवस्थेवर प्रश्न उपस्थित झाले आहेत.
डॉ. अशोक सेठ शनिवारी रात्री सहार येथील Romano रेस्टॉरंटमध्ये जेवण्यासाठी गेले होते. त्यावेळी त्यांच्या टेबलवर एक छोटे झुरळ दिसल्याचे त्यांनी पोस्टमध्ये नमूद केले आहे. टेबलवर आढळलेल्या झुरळाला हटवण्याचा प्रयत्न करण्यात आला; मात्र ते जागेवरून हलले नसल्याचा दावाही त्यांनी केला.
Look who came for dinner unexpectedly. ‘Roachie’ - a baby *cockroach was on our table wanting to share our dinner at the Romano restaurant at JW Marriott , Sahar , Mumbai, Saturday night*!!! Despite our persuasion ‘ Roachie’ refused to leave . Maybe wanted Piazza and not… pic.twitter.com/w1h92KZiaU
— Dr. Ashok Seth (@Dr_AshokSeth) September 20, 2026
या प्रसंगावर डॉ. सेठ यांनी मिश्कील अंदाजात त्या झुरळाचे ‘Roachie’ असे नामकरण केले. ‘Roachie’ला पास्ताऐवजी पिझ्झा खायचा असावा, अशी विनोदी टिप्पणी त्यांनी केली. मात्र, या घटनेमुळे वातावरणातील विनोद बाजूला राहून त्यांची जेवणाची इच्छाच निघून गेल्याचे त्यांनी स्पष्ट केले.
टेबलवर झुरळ आढळल्यानंतर डॉ. सेठ आणि त्यांच्यासोबत असलेले लोक रेस्टॉरंटमधून बाहेर पडल्याचे त्यांनी सोशल मीडिया पोस्टमध्ये सांगितले. तसेच, या प्रकाराची दखल घेऊन आवश्यक ती कार्यवाही करावी, अशी विनंती करत त्यांनी महाराष्ट्र अन्न व औषध प्रशासनाच्या (FDA) अधिकाऱ्यांना टॅग केले आहे.
FDAच्या भूमिकेकडे लक्ष
या घटनेनंतर रेस्टॉरंटमधील स्वच्छता आणि अन्नसुरक्षेच्या व्यवस्थेबाबत चर्चा सुरू झाली आहे. विशेषतः फाईव्ह स्टार हॉटेलमधील रेस्टॉरंटमध्ये असा प्रकार घडल्याचा दावा समोर आल्याने या प्रकरणाची चर्चा सोशल मीडियावर होत आहे.
डॉ. सेठ यांच्या पोस्टनंतर FDA या प्रकरणाची दखल घेते का, संबंधित रेस्टॉरंटची पाहणी किंवा तपासणी केली जाते का, तसेच नियमांचे उल्लंघन आढळल्यास कोणती कार्यवाही होते, याकडे लक्ष लागले आहे.
मात्र, रेस्टॉरंट व्यवस्थापन किंवा FDAकडून या घटनेबाबत अद्याप अधिकृत प्रतिक्रिया अथवा कारवाईची माहिती समोर आलेली नाही. त्यामुळे झुरळ टेबलपर्यंत नेमके कसे पोहोचले आणि अन्नस्वच्छतेच्या नियमांचा प्रत्यक्ष भंग झाला का, याबाबत स्वतंत्र अधिकृत निष्कर्ष उपलब्ध झालेला नाही.
