कावड यात्रेच्या तयारीची पाहणी करताना संतोष बांगर यांचा विश्वास; २४ ऑगस्टच्या यात्रेत एक लाखांहून अधिक शिवभक्त सहभागी होणार
हिंगोली : शिवसेना पक्ष आणि धनुष्यबाण या चिन्हाच्या मुद्द्यावर सर्वोच्च न्यायालयात लढाई सुरू असतानाच कळमनुरीचे आमदार संतोष बांगर यांनी आपली भूमिका स्पष्ट केली आहे. आम्हीच बाळासाहेब ठाकरे यांच्या विचारांवर चालणारी मूळ शिवसेना असून, महादेवाच्या कृपेने धनुष्यबाण हे चिन्ह आम्हालाच मिळेल, असा विश्वास त्यांनी व्यक्त केला.
कावड यात्रेच्या तयारीची पाहणी करत असताना आमदार संतोष बांगर वार्ताहरांशी बोलत होते. यावेळी त्यांनी विरोधकांवरही जोरदार टीका केली.
हिंदुहृदयसम्राट बाळासाहेब ठाकरे यांनी दिलेल्या विचारांनुसार आम्ही वाटचाल करत असल्याचे सांगत बांगर म्हणाले की, खरी शिवसेना ही उपमुख्यमंत्री एकनाथ शिंदे यांच्याकडेच आहे. आम्ही अनेक वर्षांपासून महादेवाची मनापासून सेवा करत आहोत. दरवर्षी श्रावण महिन्यात कावड यात्रा काढण्यात येते आणि यंदाच्या यात्रेत एक लाखापेक्षा जास्त शिवभक्त सहभागी होणार आहेत. आमची श्रद्धा आणि भक्तांची सेवा पाहून महादेव आम्हाला नक्की न्याय देईल, असा विश्वास त्यांनी व्यक्त केला.
पुढे बोलताना बांगर म्हणाले की, यापूर्वी निवडणूक आयोगाने आमच्या बाजूने निर्णय दिला आहे. आता सर्वोच्च न्यायालयातही आमचाच विजय होईल. विरोधक कितीही खोटा प्रचार करत असले तरी अखेर सत्याचाच विजय होणार असल्याचा दावा त्यांनी केला.
२४ ऑगस्टच्या कावड यात्रेची तयारी
यावेळी संतोष बांगर यांनी २४ ऑगस्ट रोजी होणाऱ्या कावड यात्रेच्या व्यवस्थेबाबतही माहिती दिली. भाविकांना कोणतीही अडचण येऊ नये यासाठी पिण्याचे पाणी, राहण्याची व्यवस्था, आरोग्य सुविधा आणि सुरक्षेची योग्य व्यवस्था करण्यात येत आहे.
या कावड यात्रेमुळे हिंगोली जिल्ह्यात भक्तीमय वातावरण निर्माण झाले असून, सर्वत्र ‘हर हर महादेव’चा गजर सुरू असल्याचेही बांगर यांनी सांगितले.
महादेवाच्या कृपेचा उल्लेख करत संतोष बांगर यांनी धनुष्यबाण चिन्हावर दावा केल्याने राजकीय वर्तुळात चर्चेला उधाण आले आहे.
