खासदार अनुप धोत्रे यांची पीडित कुटुंबाला भेट; न्यायासाठी प्रयत्नांचे आश्वासन
पातूर (Minor Girl Abuse) : तालुक्यातील सावरगाव येथे १० वर्षीय अल्पवयीन मुलीवर झालेल्या अत्याचाराच्या संतापजनक घटनेने संपूर्ण राज्यात तीव्र प्रतिक्रिया उमटत आहे. या घटनेमुळे समाजमन हादरले असून सर्व स्तरातून संताप व्यक्त केला जात आहे. दरम्यान, अकोल्याचे खासदार अनुप धोत्रे यांनी सावरगाव येथे भेट देऊन पीडित कुटुंबीयांचे सांत्वन केले. यावेळी त्यांनी कुटुंबीयांशी संवाद साधत या प्रकरणात न्याय मिळवून देण्यासाठी आपण पूर्णपणे त्यांच्या पाठीशी असल्याचा विश्वास दिला.
सदर प्रकरण (Minor Girl Abuse) फास्टट्रॅक न्यायालयात चालवून आरोपीला लवकरात लवकर कठोर शिक्षा व्हावी यासाठी राज्य शासनाकडे पाठपुरावा करणार असल्याचे खासदार धोत्रे यांनी सांगितले. तसेच पीडित कुटुंबीयांच्या पाठीशी शासन ठामपणे उभे असल्याचे आश्वासनही त्यांनी दिले. यावेळी माजी आमदार बळीराम शिरस्कार, रमण जैन, तालुका अध्यक्ष कपिल खरप, भिकाजी धोत्रे, प्रेमानंद श्रीरामे, चंद्रकांत अंधारे, राजू उगले सचिन ढोणे, छोटु देशमुख यांच्यासह इतर पदाधिकारी, कार्यकर्ते व ग्रामस्थ उपस्थित होते.
