हिंगोली (Baby monkey life Save) : माणुसकी आणि कर्तव्याची जाणीव दाखवणारी घटना हिंगोली तालुक्यातील वसई गावात घडली. भटक्या कुत्र्यांपासून जीव वाचवण्यासाठी चालू विद्युत खांबावर चढलेल्या वानर माता आणि तिच्या पिल्लाला लाईनमनच्या वेळीच घेतलेल्या निर्णयामुळे नवीन आयुष्य मिळाले.
११ जुलै रोजी वसई गावात एका वानर मादीच्या पाठीमागे काही भटकी कुत्री लागली होती. त्या वेळी मादीच्या कुशीत तिचे लहान पिल्लू स्तनपान करत होते. घाबरलेल्या अवस्थेत पळण्यासाठी जवळपास कोणतेही झाड नसल्याने वानर मादीने पर्याय नसल्याने थेट चालू विद्युत खांब गाठला. आपल्या (Baby monkey life Save) पिल्लाला घट्ट धरून ती खांबाच्या आधारावर बसून राहिली. ही धोकादायक परिस्थिती लाईनमन शिंदे यांच्या नजरेस पडली.
क्षणाचाही विलंब न करता त्यांनी त्या परिसरातील वीजपुरवठा तातडीने बंद केला. त्यानंतर त्यांनी कुत्र्यांना हाकलून दिले आणि स्वतःच्या सुरक्षेची पर्वा न करता खांबाजवळ जाऊन वानर माता व पिल्लाला सुरक्षितपणे खाली उतरवले. शिंदे यांच्या सतर्कतेमुळे आणि धाडसी कृतीमुळे केवळ दोन मुक्या जीवांचेच प्राण वाचले नाहीत तर संभाव्य मोठा विद्युत अपघातही टळला. या घटनेनंतर गावकर्‍यांनी शिंदे यांच्या कार्याचे भरभरून कौतुक केले. कर्तव्याप्रती असलेली त्यांची बांधिलकी आणि प्राण्यांबद्दलची संवेदनशीलता यामुळे आज वसई गावात त्यांच्या या कामाची सर्वत्र चर्चा आहे.
