मराठा सेवा संघ, संभाजी ब्रिगेड व जिजाऊ ब्रिगेडच्या संयुक्त विद्यमाने आयोजन
हिंगोली (Shivkutumb Melava) : मराठा सेवा संघ, संभाजी ब्रिगेड, जिजाऊ ब्रिगेड व सर्व कक्षांच्या संयुक्त विद्यमाने दि. ६ जून २०२६ रोजी हिंगोली येथे आयोजित ‘शिवकुटुंब मेळाव्या’च्या पार्श्वभूमीवर आज प्राथमिक नियोजन बैठक उत्साहपूर्ण वातावरणात पार पडली.
जिल्हाध्यक्ष शिवाजी ढोकर पाटील यांच्या अध्यक्षतेखाली झालेल्या या बैठकीत कार्यक्रमाची रूपरेषा, विविध उपक्रम, नियोजन व जबाबदाऱ्यांबाबत सविस्तर चर्चा करण्यात आली.
या मेळाव्यात किमान १०० कुटुंबांचा सहभाग असावा, असा निर्धार यावेळी सर्व पदाधिकाऱ्यांनी व्यक्त केला. शिवविचारांचा प्रसार व समाज प्रबोधन हा या मेळाव्याचा मुख्य उद्देश असणार आहे.
पुढील नियोजनासाठी रविवार, दि. २४ मे रोजी पुन्हा बैठक आयोजित करण्यात आली असून, मराठा सेवा संघाच्या सर्व पदाधिकारी, कार्यकर्ते व सदस्यांनी बैठकीस उपस्थित राहण्याचे आवाहन आयोजकांनी केले आहे.
आजच्या बैठकीस खंडेराव सरनाईक, डॉ. नामदेव कोरडे, पंडित अवचार, पंडित सिरसाठ, राजकुमार वायचाळ, महेश राखोंडे पाटील यांच्यासह इतर पदाधिकारी व कार्यकर्ते उपस्थित होते.
