अक्कलकोट रोड एमआयडीसी परिसरातील कंपनीसमोर रात्रीची थरारक घटना; लग्नाचा राग मनात ठेवून आरोपीने रचला कट
सोलापुर (Solapur Murder) : सोलापुरात एकतर्फी प्रेमातून उद्भवलेल्या संतापाचे भीषण रूप समोर आले आहे. प्रेयसीचे दुसऱ्याशी लग्न झाल्याचा राग मनात धरून एका १९ वर्षीय तरुणाने तिच्या पतीवर धारदार कोयत्याने सपासप वार करत त्याची हत्या केल्याची धक्कादायक घटना अक्कलकोट रोड एमआयडीसी परिसरात घडली. या प्रकरणी एमआयडीसी पोलिसांनी आरोपीला तातडीने अटक केली असून पुढील तपास सुरू आहे.
या घटनेत सिद्धाराम कैलास कटप (वय २०, व्यवसाय – रिक्षाचालक) यांचा मृत्यू झाला. तर संतोष महादेव पाटील (वय १९) असे अटक करण्यात आलेल्या आरोपीचे नाव आहे. ही घटना अक्कलकोट रोड एमआयडीसी येथील एका कंपनीसमोर रात्री सव्वा दहाच्या सुमारास घडली.
पोलिसांनी दिलेल्या माहितीनुसार, सिद्धाराम आणि संतोष हे दोघेही एकाच परिसरात वास्तव्यास आहेत. परिसरातील एका तरुणीवर संतोषचे एकतर्फी प्रेम होते. त्याने संबंधित तरुणीला विवाहासाठी मागणीही घातली होती. मात्र, तिने त्याचा प्रस्ताव नाकारला. त्यानंतर २० एप्रिल रोजी त्या तरुणीचा विवाह सिद्धाराम कटप याच्यासोबत झाला.
या विवाहानंतर संतोषच्या मनात सिद्धारामविषयी तीव्र राग आणि सूडाची भावना निर्माण झाली होती. त्यातूनच त्याने सिद्धारामला फोन करून अक्कलकोट रोड परिसरात भेटण्यासाठी बोलावले. दोघांमध्ये झालेला वाद काही वेळातच उग्र झाला. त्यानंतर संतोषने सोबत आणलेल्या धारदार कोयत्याने सिद्धारामवर वारंवार हल्ला केला.
या हल्ल्यात सिद्धाराम गंभीर जखमी झाले आणि त्यांचा घटनास्थळीच मृत्यू झाला. या प्रकरणी सोलापूरच्या एमआयडीसी पोलीस ठाण्यात खुनाचा गुन्हा नोंद करण्यात आला असून पोलिसांकडून पुढील तपास सुरू आहे.
