सरकारने सकारात्मक दखल घ्यावी; अन्यथा महाराष्ट्रभर आंदोलन अधिक तीव्र करण्याचा इशारा
मानोरा : गोर बंजारा समाजाच्या अनुसूचित जमाती (एसटी) आरक्षणाच्या मागणीसाठी पोहरादेवी येथे १३ सप्टेंबरपासून राज्यातील विविध जिल्ह्यांतील ९ आंदोलनकर्त्यांनी सामूहिक आमरण उपोषणाला सुरुवात केली आहे. बंजारा समाजाच्या आरक्षणाच्या प्रश्नावर शासनाने तातडीने सकारात्मक निर्णय घ्यावा, अशी मागणी आंदोलनकर्त्यांनी मुख्यमंत्री देवेंद्र फडणवीस यांच्याकडे केली आहे.
बंजारा समाजाचा एसटी आरक्षणाचा प्रश्न अनेक वर्षांपासून प्रलंबित असून, शासनाने या प्रश्नाकडे गांभीर्याने लक्ष देण्याची आवश्यकता आहे. तीर्थक्षेत्र पोहरादेवी हे बंजारा समाजाचे श्रद्धास्थान असून, याच ठिकाणाहून आरक्षणाच्या हक्कासाठी आंदोलनाची दिशा अधिक व्यापक करण्याचा निर्णय आंदोलनकर्त्यांनी व्यक्त केला आहे.
सरकारने या आमरण उपोषणाची आणि एसटी आरक्षणाच्या मागणीची सकारात्मक दखल घेऊन ठोस भूमिका जाहीर करावी. अन्यथा आगामी काळात आंदोलन महाराष्ट्रभर अधिक तीव्र करण्यात येईल, असा इशाराही आंदोलनकर्त्यांनी शासनाला दिला आहे.
या सामूहिक आमरण उपोषणाला संजय महाराज (पोहरादेवी), श्रीकांत राठोड (जालना), सतीश पवार (बीड), सुरेश राठोड (हिंगोली), नामदेव राठोड (औंढा नागनाथ), दिनकर राठोड (पुसद), रमेश उर्फ सोनू पवार (उमरीगड), अंकुश राठोड (बुलढाणा) आणि जयसिंग राठोड (आर्णी) आदींनी सुरुवात केली आहे.
उपोषणाच्या पहिल्या दिवशी धर्मगुरू जितेंद्र महाराज, धर्मगुरू कबीरदास महाराज, जयकिसन राठोड, भाऊ नाईक, युवा नेते इंदल भोला राठोड आदींसह गोर बंजारा समाजातील अनेक नेत्यांनी भेट देऊन जाहीर पाठिंबा दिला.
बंजारा समाजाचा एसटी आरक्षणाचा मुद्दा पुन्हा एकदा चर्चेच्या केंद्रस्थानी आला असून, आता शासन या आंदोलनाची दखल किती गांभीर्याने घेते, याकडे संपूर्ण देशासह राज्यातील बंजारा समाज बांधवांचे लक्ष लागले आहे.
