लोकनेते विलासराव देशमुख यांच्या जयंतीनिमित्त ऊस उत्पादक शेतकरी सभासदांसाठी गोड बातमी
लातूर (Sugar Factory) : राज्यातील सहकारी साखर कारखानदारीतील दीपस्तंभ आणि देशपातळीवर नावलौकिक मिळवलेल्या लातूर तालुक्यातील विकासरत्न विलासराव देशमुख मांजरा शेतकरी सहकारी साखर कारखान्याचा गळीत हंगाम कारखान्याचे चेअरमन तथा माजी मंत्री दिलीपराव देशमुख यांच्या मार्गदर्शनाखाली यशस्वीरित्या संपन्न झाला.
कारखान्याने गळीत हंगाम 2025-26 मध्ये 7,15,409.410 मेट्रिक टन उसाचे गाळप केले असून 5,88,540 क्विंटल साखरेचे उत्पादन केले आहे. ज्यूस सिरप व बी हेवीसह सरासरी साखर उतारा 12.30 टक्के प्राप्त झाला आहे. कारखान्याने आजअखेर 2,98,49,508 युनिट्स विजेची निर्यात केली आहे.
सध्या अर्कशाळा विभाग सुरू असून आजअखेर अर्कशाळा प्रकल्पामधून 1,98,52,806 लिटर्स इथेनॉल उत्पादन झाले असून त्यापैकी 1,66,90,000 लिटर्स इथेनॉलचा पुरवठा ऑइल कंपन्यांना करण्यात आला आहे. तसेच 2,26,14,675 लिटर्स अल्कोहोलचे उत्पादन झाले असून 1,01,370.68 किलो सीबीजीचे उत्पादन करण्यात आले आहे.
मांजरा कारखान्याने गळीत हंगाम 2025-26 साठी यापूर्वी ऊस पुरवठादार शेतकऱ्यांना 2750 रुपये प्रति मेट्रिक टन प्रमाणे पहिला हप्ता अदा केला आहे.
ऊस पुरवठादार शेतकऱ्यांमध्ये आनंदाचे वातावरण
सध्या शेतकऱ्यांची उन्हाळी कामे सुरू आहेत. ऊस पिकासाठी खत तसेच मान्सूननंतरच्या पेरणीसाठी शेतकऱ्यांना मदत व्हावी या दृष्टीने गळीत हंगाम 2025-26 मध्ये कारखान्यास गाळपास दिलेल्या उसासाठी ऊस पुरवठादार शेतकऱ्यांना देय असलेल्या एफआरपीपैकी 100 रुपये प्रति मेट्रिक टन प्रमाणे दुसऱ्या हप्त्याचे ऊस बिल कारखान्याचे चेअरमन तथा माजी मंत्री सहकार महर्षी दिलीपराव देशमुख यांच्या आदेशाने दिनांक 25 मे 2026 रोजी ऊस पुरवठादारांच्या खात्यावर जमा करण्यात आले असल्याची माहिती कारखाना प्रशासनाने दिली आहे.
तसेच संबंधित शेतकऱ्यांनी आपल्या बँक शाखेशी संपर्क साधावा, असे आवाहनही कारखाना प्रशासनाने केले आहे. दुसरा हप्ता खात्यावर जमा झाल्याने ऊस पुरवठादार शेतकऱ्यांमध्ये आनंदाचे वातावरण पाहावयास मिळत आहे.
