रांगी (Teak Wood Cutting) : धानोरा तालुक्यातील मेंढा गावातील अवैध रित्या बिजा व सागवान लाकडाची कटाई करताना तिन व्यक्तींना अटक करून ३० मार्च पर्यंत वन कोठडी घेतल्याची घटना ताजी असतानाच, वनाधिकार्‍यांच्या गस्ती दरम्यान निमगाव (रांगी) च्या जंगलातून अवैधरित्या सागवान लाकडाची कटाई करताना आढळलेल्या तीन आरोपींना वनाधिकार्‍यांनी अटक केल्याची घटना निमगाव गावालगत घडली.
अविनाश एकनाथ गावळे, आनंदराव चिन्नू पदा, पितांबर मसरु दुगा तिघेही रा. निमगाव अशी अटकेतील आरोपींची नावे आहेत. त्यांना न्यायालयात हजर केले असता २ दिवसाची वनकोठडी ठोठावण्यात आली. शनिवार २८ मार्च रोजी सकाळी सहाय्यक वनसंरक्षक यादव यांच्या मार्गदर्शनात रांगी उपक्षेत्रातील क्षेत्रसहाय्यक के. व्ही. ढवळे, वनरक्षक एम. एन. कोहळे, एम. एम. राउत, एस. के. हलामी गस्तीवर असताना कक्ष क्रमांक ४३६ मध्ये अवैध रित्या सागवान लाकडाची कटाई करतांना आरोपी आढळले . या गुन्ह्याबाबत भारतीय वन अधिनियम १९२७ च्या विविध कलमान्वये गुन्हा दाखल करण्यात आला.
यात आणखी काही आरोपींचा सहभाग असण्याची शक्यता नाकारता येत नाही. तीनही आरोपींना ३० मार्च पर्यंत वनकोठडी मिळाली असून पुढील तपास गडचिरोली वनविभागाच्या उपवनसंरक्षक आर्या व्हि. एस. सहाय्यक वनसंरक्षक महेंद्र यादव यांच्या मार्गदर्शनात उत्तर धानोरा परिक्षेत्राचे वनपरिक्षेत्र अधिकारी एस.बी.कायते यांचे अधिनिस्त वनकर्मचारी करीत आहेत.
