रोकड, सोन्याचे दागिने असा सुमारे १ लाख ५९ हजारांचा ऐवज लंपास
माहूर (Temple Theft) : रेणुका माता मंदिर येथे दर्शनासाठी आलेल्या एका भाविक महिलेची पर्स चोरी झाल्याची घटना दि. १८ रोजी सकाळच्या सुमारास घडली. या चोरीत रोकड, सोन्याच्या अंगठ्या व चांदीचे दागिने असा एकूण सुमारे १ लाख ५९ हजार ६०० रुपयांचा ऐवज लंपास करण्यात आल्याची फिर्याद मुंबई, डोंबिवली येथील भाविक महिला उषा तायडे यांनी माहूर पोलिसात दिली आहे.
प्राप्त माहितीनुसार, भाविक महिला उषा तायडे या मुलगी सीमा अशोक पाटील व इतर नातेवाईकांसह पहाटे ४:३० वाजता माहूर येथे देवदर्शनासाठी आल्या होत्या. खासगी रूममध्ये मुक्कामाची व्यवस्था करून सकाळी पायी चालत रेणुका मातेच्या दर्शनासाठी गडावर गेल्या. महिलेच्या पर्समध्ये ५७ हजार रुपये रोख, ५ ग्रॅम व ६ ग्रॅम वजनाच्या दोन सोन्याच्या अंगठ्या तसेच १० ग्रॅम चांदीचे जोडवे ठेवले होते.
सकाळी सुमारे ७:३० वाजता श्री रेणुका मातेच्या दर्शनासाठी मंदिरात रांगेत उभे असताना संबंधित महिलेच्या लक्षात आले की, त्यांच्या डाव्या बाजूस असलेली पर्स गायब झाली आहे. त्यानंतर त्यांनी तातडीने मंदिराबाहेर येऊन सुरक्षा रक्षक महादेव मुंडे यांना माहिती दिली.
सुरक्षा रक्षकांनी तत्काळ मंदिर परिसरातील सीसीटीव्ही फुटेजची पाहणी केली असता, फिकट निळ्या रंगाची साडी परिधान केलेली एक महिला पर्स चोरताना आणि मंदिराबाहेर नेताना दिसून आल्याचे निष्पन्न झाले.
याप्रकरणी माहूर पोलिसात अज्ञात महिलेविरुद्ध गुन्हा दाखल करण्यात आला असून पुढील तपास पोलीस निरीक्षक यांच्या मार्गदर्शनाखाली पीएसआय जाधव करीत आहेत. पोलिसांकडून सीसीटीव्ही फुटेजच्या आधारे संशयित महिलेचा शोध घेतला जात आहे.
