कळमनुरी (Kalamnuri Heavy Rain) : शहरात अचानक आलेल्या वादळी वाऱ्यासह जोरदार पावसामुळे नागरिकांची मोठी तारांबळ उडाली. अल्पावधीत झालेल्या पावसामुळे शहरातील अनेक भागांमध्ये नाल्यांचे घाण पाणी रस्त्यावर आले असून, नागरिकांना या सांडपाण्यातून रस्ता ओलांडण्याची वेळ आली आहे.
पावसाळ्याच्या पार्श्वभूमीवर नाल्यांची स्वच्छता व पाणी निचऱ्याची योग्य व्यवस्था करण्याची गरज असताना नगरपरिषदेचे याकडे दुर्लक्ष होत असल्याची नाराजी नागरिकांमधून व्यक्त होत आहे. (Kalamnuri Heavy Rain) रस्त्यावर साचलेल्या घाण पाण्यामुळे दुर्गंधी पसरत असून, आरोग्याच्या समस्या निर्माण होण्याची भीती व्यक्त केली जात आहे.
"अचानक पाऊस आला की दरवेळी हीच परिस्थिती निर्माण होते, मग नगरपरिषद प्रशासन याकडे लक्ष का देत नाही?" असा प्रश्न नागरिक उपस्थित करत आहेत. शहरातील नाल्यांची तातडीने साफसफाई करून पाणी निचरा व्यवस्था सुरळीत करण्याची मागणी नागरिकांकडून होत आहे.
