मुदखेड तालुक्यात कार गोदावरी नदीपात्रात घालून टोकाचे पाऊल; एसडीआरएफने तिघांचे मृतदेह बाहेर काढले
नांदेड : नांदेड जिल्ह्यातील मुदखेड तालुक्यात घडलेल्या एका धक्कादायक घटनेने संपूर्ण जिल्हा हादरला आहे. जिल्हा परिषदेच्या एका शिक्षकाने आपल्या दोन लहान मुलांसह आत्महत्या केल्याची घटना समोर आली आहे. व्हॉट्सअ‍ॅपवर स्टेटस ठेवून वरिष्ठ अधिकाऱ्यांवर गंभीर आरोप करत संबंधित शिक्षकाने कार थेट गोदावरी नदीपात्रात घातल्याची प्राथमिक माहिती समोर आली असून, या घटनेचा तपास नांदेड पोलीस करत आहेत.
मिळालेल्या माहितीनुसार, आत्महत्या करणाऱ्या शिक्षकाचे नाव सुनील मोरे असून ते हिमायतनगर तालुक्यातील पोटा बुद्रुक येथील जिल्हा परिषद शाळेत शिक्षक म्हणून कार्यरत होते. त्यांनी आपल्या मुलगी सारा आणि मुलगा सुमित यांना सोबत घेऊन मुदखेड तालुक्यातील आमदुरा येथील गोदावरी नदीपात्रात कार घातली. कारमध्येच गुदमरल्याने तिघांचाही दुर्दैवी मृत्यू झाला.
घटनेपूर्वी सुनील मोरे यांनी व्हॉट्सअ‍ॅपवर स्टेटस ठेवत हदगाव गट शिक्षणाधिकारी आणि केंद्रप्रमुख यांच्या जाचाला कंटाळल्याचा उल्लेख केला होता. प्राथमिक माहितीनुसार, गटशिक्षणाधिकारी आणि विस्तार अधिकारी यांच्या त्रासामुळे त्यांनी हे टोकाचे पाऊल उचलल्याची शक्यता व्यक्त केली जात आहे. मात्र, याबाबतचा अधिकृत तपास पोलीस करत आहेत.
घटनेची माहिती मिळताच पोलीस घटनास्थळी दाखल झाले. त्यानंतर एसडीआरएफच्या पथकाने नदीपात्रातून कार बाहेर काढत त्यामधील तिघांचे मृतदेह ताब्यात घेतले.
सुनील मोरे हे भोकर तालुक्यातील बेंबर गावचे मूळ रहिवासी होते. त्यांच्या आकस्मिक निधनामुळे शिक्षण क्षेत्रात मोठी खळबळ उडाली असून, एका शिक्षकाने आपल्या दोन चिमुकल्या मुलांसह जीवन संपवल्याच्या घटनेबद्दल सर्वत्र हळहळ व्यक्त केली जात आहे.
दरम्यान, या प्रकरणाचा पुढील तपास नांदेड पोलीस करीत आहेत.
