खामगावच्या गोपाल नगरमधील घटना; घरातून भांडणाचा आवाज ऐकून नागरिकांची गर्दी
बुलढाणा जिल्ह्यातील खामगाव शहरात पत्नीच्या चारित्र्यावर संशय घेत पतीने तिची हत्या केल्याची घटना घडली आहे. गोपाल नगर परिसरात रात्रीच्या सुमारास ही घटना घडली. गणेश डाबेराव असे आरोपी पतीचे नाव असून शिवाजीनगर पोलिसांनी त्याला अटक केली आहे.
पत्नीच्या चारित्र्यावरून गणेश डाबेराव याचा तिच्यासोबत वारंवार वाद होत असल्याची माहिती आहे. रात्री साडेआठच्या सुमारास दोघांमध्ये पुन्हा वाद झाला. यावेळी संतापलेल्या गणेशने बेसबॉल स्टिकने पत्नीला मारहाण केली. या मारहाणीत तिचा मृत्यू झाला.
दरम्यान, डाबेराव यांच्या घरातून मोठ्याने आरडाओरड आणि भांडणाचा आवाज ऐकू आल्याने परिसरातील नागरिक घराबाहेर जमा झाले. नागरिकांनी गणेशकडे घटनेबाबत विचारणा केली असता, पत्नीचे कुणासोबत तरी लफडं असल्याचा संशय असल्याने तिला संपवल्याचे त्याने सांगितले.
यानंतर नागरिकांनी घरात पाहिले असता महिला गंभीर अवस्थेत पडलेली दिसून आली. घटनेची माहिती तातडीने शिवाजीनगर पोलिसांना देण्यात आली. पोलिसांनी घटनास्थळी पोहोचून गणेश डाबेरावला ताब्यात घेत अटक केली.
महिलेचा मृतदेह पोलिसांनी ताब्यात घेऊन शवविच्छेदनासाठी रुग्णालयात पाठवला आहे. या प्रकरणी गणेश डाबेरावविरोधात हत्येचा गुन्हा दाखल करण्यात आला असून शिवाजीनगर पोलीस पुढील तपास करत आहेत. या घटनेमुळे गोपाल नगर परिसरात खळबळ उडाली आहे.
