मोरवाडीतील करिष्मा ग्लोरी सोसायटीतील घटना; सुसाईड नोट सापडली, संत तुकाराम नगर पोलिसांकडून तपास सुरू
पिंपरी-चिंचवडमधील मोरवाडी परिसरातील करिष्मा ग्लोरी सोसायटीत एकाच कुटुंबातील तिघांचा मृत्यू झाल्याची हृदयद्रावक घटना समोर आली आहे. प्राथमिक माहितीनुसार, आर्थिक विवंचनेमुळे कुटुंबाने टोकाचे पाऊल उचलल्याचा संशय व्यक्त करण्यात येत आहे. या घटनेने संपूर्ण परिसरात शोककळा पसरली असून नागरिकांमध्ये हळहळ व्यक्त केली जात आहे.
या घटनेत विनोद पिल्ले (वय ५०) यांचा घटनास्थळीच मृत्यू झाला. त्यांची पत्नी सिरजा पिल्ले (वय ४५) आणि मुलगी पौर्णिमा पिल्ले (वय १९) या दोघींना गंभीर अवस्थेत वायसीएम रुग्णालयात दाखल करण्यात आले होते. मात्र उपचार सुरू असतानाच दोघींचाही मृत्यू झाला.
प्राथमिक तपासात पोलिसांना घटनास्थळावरून सुसाईड नोट आणि रासायनिक द्रव्याचा डबा आढळून आला आहे. पत्रात आर्थिक अडचणींमुळे हे टोकाचे पाऊल उचलत असल्याचे नमूद करण्यात आले असून, "या घटनेसाठी कोणालाही जबाबदार धरू नये," असे विनोद पिल्ले यांनी लिहिल्याचे पोलिसांनी सांगितले आहे.
तपासात समोर आलेल्या माहितीनुसार, विनोद पिल्ले यांनी आयआयएम अहमदाबाद येथून संगणक शास्त्राचे शिक्षण घेतले होते. ते आपल्या कुटुंबासह मोरवाडीतील करिष्मा ग्लोरी सोसायटीत राहत होते. त्यांची पत्नी सिरजा पिल्ले या एका नामांकित शाळेत समन्वयक म्हणून कार्यरत होत्या. त्या कामावर न आल्याने सहकाऱ्यांनी त्यांच्या नातेवाईकांना माहिती दिली आणि त्यानंतर ही घटना उघडकीस आली.
पोलिसांच्या प्राथमिक तपासानुसार, १ जून रोजी विनोद पिल्ले यांनी ऑनलाइन एक रासायनिक द्रव्य मागवले होते. त्यानंतर ते कोळशावर जाळून त्याचा धूर घरात पसरवण्यात आल्याचा संशय व्यक्त करण्यात येत आहे. या प्रकरणाचा तपास सुरू असून, या संदर्भातील सर्व बाबींची पडताळणी केली जात आहे.
तपासादरम्यान पिल्ले कुटुंबावर मोठे आर्थिक कर्ज असल्याची माहितीही समोर आली आहे. हे कर्ज फेडण्यासाठी त्यांनी तीन वर्षांपूर्वी नेहरूनगर येथील स्वतःचे घर विकले होते. त्यानंतर हे कुटुंब मोरवाडी येथे भाड्याच्या घरात राहत होते.
या संपूर्ण प्रकरणाचा संत तुकाराम नगर पोलीस सर्व बाजूंनी तपास करत आहेत. मृत्यूमागील नेमके कारण आणि इतर कोणतीही शक्यता आहे का, याचाही शोध पोलिसांकडून घेतला जात आहे.
