तिरोडा (Parswara torture case) : तालुक्यातील परसवाडा येथे नराधम युवकाने अल्पवयीन मुलीवर अत्याचार करून तिचे अपहरण करीत शाळेत डांबल्याची घटना २२ एप्रिल रोजी समोर आली होती. या घटनेने परिसरात एकच खळबळ उडाली होती. दवनीवाडा पोलिसांनी गुन्हा नोंद करून फरार असलेल्या आरोपी सुमित देवानंद ऊईके (२१) याचा शोध सुरू केला होता. दरम्यान आज (ता.२३) सकाळी आरोपी सुमित ऊईके पोलिसांच्या हाती लागला. आरोपीला अटक करून न्यायालयात हजर केले असता आरोपीला एक दिवसाची पोलिस कोठडी सुनावण्यात आली आहे.
परसवाडा (Parswara torture case) येथील अल्पवयीन पीडित मुलीने लग्नासाठी नकार दिल्याच्या रागातून सुमित ऊईके या युवकाने मुलीचे अपहरण करून तिच्यावर अत्याचार केले. इतकेच नव्हे तर, पीडितेचे हात-पाय आणि तोंड बांधून तिला जिल्हा परिषद शाळेच्या खोलीत डांबून ठेवले. हा संतापजनक प्रकार २२ एप्रिल रोजी उघडकीस येताच तिरोडा तालुक्यात एकच खळबळ उडाली. याप्रकरणी दवनीवाडा पोलिसांनी आरोपीविरुद्ध ‘पोक्सो'सह भारतीय न्याय संहितेच्या विविध कलमान्वये गुन्हा दाखल केला.
तपासकार्य गतिमान करून फरार असलेल्या आरोपीचा शोध घेणे सुरू केले. आज, २३ एप्रिल रोजी सकाळी आरोपी सुमित ऊईके हा दवनीवाडा पोलिसांना गवसला. पोलिसांनी आरोपीला अटक करून न्यायालयात हजर केले. दरम्यान न्यायालयाने आरोपीला एक दिवसाची पोलिस कोठडी सुनावली. पुढील तपास पोलिस निरीक्षक वैशाली ढाले यांच्या मार्गदर्शनाखाली दवनीवाडा पोलिस करीत आहे.
