वॉटर पार्कमधील सुरक्षेचा प्रश्न पुन्हा ऐरणीवर…
देऊळगाव राजा (Waterpark Youth Death) : देऊळगाव राजा शहरातील खोरेश्वर महादेव मंदिर परिसरालगत असलेल्या वॉटर पार्कमध्ये आज दुपारच्या सुमारास एक हृदयद्रावक घटना घडली. पाण्यात बुडून २२ वर्षीय तरुणाचा मृत्यू झाल्याने संपूर्ण परिसरात शोककळा पसरली आहे. (Waterpark Youth Death) मृत तरुणाचे नाव शुभम भास्कर सदावर्ते (वय २२, रा. शेवली नेर, जि. जालना) असे असून, तो नाशिक येथे कामानिमित्त वास्तव्यास होता. कौटुंबिक कार्यक्रमासाठी देऊळगाव राजा येथे आलेल्या शुभमने मित्रांसोबत वॉटर पार्कमध्ये जाण्याचा निर्णय घेतला; मात्र आनंदाचे क्षण काही क्षणातच दुर्दैवी ठरले.
माहितीनुसार, पाण्यात खेळताना (Waterpark Youth Death) शुभम खोल भागात गेला आणि बुडू लागला. मित्रांनी तत्काळ मदतीचा प्रयत्न केला, मात्र परिस्थिती हाताबाहेर गेली. त्याला बाहेर काढून रुग्णालयात हलविण्यात आले, परंतु डॉक्टरांनी मृत घोषित केले. या घटनेनंतर वॉटर पार्कमधील सुरक्षा व्यवस्थेवर गंभीर प्रश्न उपस्थित झाले आहेत. घटनास्थळी प्रशिक्षित लाइफगार्ड होता का? आवश्यक सुरक्षा उपाययोजना का नव्हत्या? असा संतप्त सवाल नागरिक करत आहेत.
नातेवाईकांचा आक्रोश, कारवाईची मागणी
दरम्यान, शुभमच्या मृत्यूनंतर (Waterpark Youth Death) कुटुंबीयांवर दुःखाचा डोंगर कोसळला असून, आईचा आक्रोश पाहून उपस्थितांचे डोळे पाणावले. संतप्त नातेवाईकांनी वॉटर पार्क मालकावर गुन्हा दाखल करून तात्काळ अटक केल्याशिवाय मृतदेहाचे पोस्टमार्टम होऊ देणार नाही, असा ठाम पवित्रा घेतला आहे. सदर मृतदेह सध्या देऊळगाव राजा ग्रामीण रुग्णालयात ठेवण्यात आला असून, वृत्त लिहीपर्यंत कोणतीही ठोस कारवाई झालेली नाही. देऊळगाव राजा पोलिसांनी घटनेची नोंद घेतली असून पुढील तपास सुरू आहे.
