कलबुर्गी, कर्नाटक (Kalaburagi Incident) : अफजलपूर तालुक्यातील मदरा (के) गावाजवळ घडलेल्या एका धक्कादायक घटनेने परिसरात खळबळ उडाली आहे. एका व्यक्तीने पत्नीची निर्घृण हत्या करून आपल्या लहान मुलासह विहिरीत उडी घेतल्याची घटना समोर आली आहे.
पोलिसांच्या माहितीनुसार, लक्ष्मीपुत्र असे आरोपीचे नाव असून, त्याने कौटुंबिक वादातून आपल्या 23 वर्षीय पत्नी अंजलीची घरातच विळ्याने वार करून हत्या केली. या घटनेनंतर त्याने आपल्या लहान मुलाला घेऊन जवळील विहिरीत उडी घेतली.
घटनेची माहिती मिळताच स्थानिक ग्रामस्थांनी तात्काळ घटनास्थळी धाव घेत बचावकार्य सुरू केले. ग्रामस्थांच्या तत्परतेमुळे मुलाला सुरक्षित बाहेर काढण्यात यश आले; मात्र लक्ष्मीपुत्रचा पाण्यात बुडून मृत्यू झाला.
रेवूर पोलीस ठाण्याचे अधिकारी तसेच ‘सीन ऑफ क्राइम’ (SOCO) पथकाने घटनास्थळी भेट देऊन पंचनामा केला. अंजलीचा मृतदेह शवविच्छेदनासाठी पाठविण्यात आला असून, आरोपीचा मृतदेहही नंतर विहिरीतून बाहेर काढण्यात आला.
या प्रकरणी रेवूर पोलीस ठाण्यात गुन्हा दाखल करण्यात आला असून, घटनेमागील नेमके कारण शोधण्यासाठी पुढील तपास सुरू आहे.
