'टू लेट' चित्रपटासाठी मिळाला होता राष्ट्रीय पुरस्कार; दीर्घ आजाराशी झुंज देत उपचारादरम्यान निधन
सिनेसृष्टीतून एक दु:खद बातमी समोर आली आहे. राष्ट्रीय पुरस्कार विजेते चित्रपट दिग्दर्शक आणि प्रसिद्ध छायाचित्रकार आर. चेझियान यांचे शुक्रवारी निधन झाले. ते 57 वर्षांचे होते. गेल्या अनेक महिन्यांपासून ते दीर्घ आजाराने त्रस्त होते आणि खासगी रुग्णालयात त्यांच्यावर उपचार सुरू होते. उपचारादरम्यान त्यांची प्राणज्योत मालवली.
आर. चेझियान यांनी दिग्दर्शित केलेल्या 'टू लेट' या चित्रपटाला राष्ट्रीय पुरस्कार मिळाला होता. या चित्रपटाने प्रेक्षकांसह समीक्षकांचीही विशेष दाद मिळवली होती. तसेच या चित्रपटाला 'गोल्डन बेंगाल टायगर' ट्रॉफी, 7 लाख रुपयांचे रोख पारितोषिक आणि प्रमाणपत्र प्रदान करण्यात आले होते.
पडद्यामागे राहून आपल्या कॅमेऱ्याच्या माध्यमातून वेगळी ओळख निर्माण करणाऱ्या आर. चेझियान यांनी छायाचित्रकार म्हणून अनेक गाजलेल्या चित्रपटांमध्ये काम केले. 'जोकर', 'कॉलेज', 'थेनमेरकू परुवाकाट्रू' आणि 'परदेसी' या चित्रपटांसाठी त्यांनी छायाचित्रणाची जबाबदारी सांभाळली होती. 2013 च्या लंडन चित्रपट महोत्सवात 'परदेसी' चित्रपटासाठी उत्कृष्ट छायाचित्रणाचा पुरस्कारही त्यांना मिळाला होता.
'टू लेट' या चित्रपटात भाड्याचे घर शोधण्यासाठी संघर्ष करणाऱ्या एका निम्न-मध्यमवर्गीय कुटुंबाची हृदयस्पर्शी कहाणी प्रभावीपणे मांडण्यात आली होती. या वास्तववादी चित्रपटामुळे आर. चेझियान यांना राष्ट्रीय स्तरावर मोठी ओळख मिळाली.
आर. चेझियान हे मूळचे तामिळनाडूतील शिवगंगा जिल्ह्यातील नट्टरसनकोट्टाई येथील रहिवासी होते. चित्रपटसृष्टीत येण्यापूर्वी त्यांनी इंजिनिअर म्हणून काम केले होते. त्यानंतर त्यांनी प्रसिद्ध सिनेमॅटोग्राफर पी. सी. श्रीराम यांच्यासोबत आपल्या कारकिर्दीची सुरुवात केली. पुढे 'थेनमेरकू परुवाकाट्रू', 'परदेसी' आणि 'जोकर' यांसारख्या चित्रपटांमध्ये सिनेमॅटोग्राफर म्हणून काम करत त्यांनी चित्रपटसृष्टीत स्वतःची वेगळी ओळख निर्माण केली.
