मानोरा (Fake fertilizer) : तालुक्यातील कारपा येथील शेतकर्‍यांची फसवणूक रोखण्यासाठी जिल्हा व तालुका स्तरावरून प्रभावी कारवाई करण्यात आली. मिळालेल्या गोपनीय माहितीच्या आधारे जिल्हा भरारी पथक आणि तालुका भरारी पथकाच्या संयुक्त मोहिमेमध्ये (Fake fertilizer) बनावट खत साठवणुकीचा पर्दाफाश करण्यात आला असून, सुमारे १०. ५ लाखांचा मुद्देमाल जप्त करण्यात आला आहे.
या कारवाईदरम्यान ६०० बॅगा खत आढळून आला. यामध्ये ३३० बॅगा नॉन – ब्रँडेड असून, २७० बॅगा ‘कृभको’ कंपनीच्या १० :२६ : २६ ब्रँडच्या पिशव्यांमध्ये भरलेले बनावट खत आढळले. याशिवाय, १५८ रिकाम्या खताच्या बॅगा देखील साठवलेल्या अवस्थेत आढळून आल्या. कारवाई दरम्यान ङजिल्हा कृषी विकास अधिकारी अभिजीत देवगिरीकर, मोहीम अधिकारी गणेश गिरी, तालुका कृषी अधिकारी रोशन भागवत, जिल्हा गुणवत्ता नियंत्रण निरीक्षक अरुण इंगळे, कृषी अधिकारी पंचायत समिती सोपान साळवे, मंडळ कृषी अधिकारी उमेश राठोड, तसेच विभागीय तंत्र अधिकारी (गुणनियंत्रण) राजेश जानकर मानोरा तालुका कृषी अधिकारी कृषी पर्यवेक्षक आर. व्ही. सवणे आणि इतर अधिकार्‍यांची उपस्थिती होती. सदर प्रकरणी खत नियंत्रण आदेश व जीवनावश्यक वस्तू अधिनियम, १९५५ अंतर्गत योग्य ती कायदेशीर कारवाई करण्यात आली आहे.
बनावट खत विक्रीमुळे (Fake fertilizer) शेतकर्‍यांचे नुकसान टाळण्यासाठी कृषी विभाग सजग असून, अशा प्रकारच्या कारवायांद्वारे बनावट खत विक्रेत्यांवर वचक बसवण्याचा निर्धार अधिकार्‍यांनी व्यक्त केला आहे.
