खापरखेडा (Bull Lightning Death) : सावनेर तालुक्यातील वलनी येथे आज परिसरात झालेल्या हंगामातील पहिल्याच पावसादरम्यान वीज कोसळून एका बैलाचा मृत्यू झाल्याची दुर्दैवी घटना वलनी येथे घडली. या घटनेत शेतकरी महादेव शिवारऊके यांचे मोठे आर्थिक नुकसान झाले आहे.
माहितीनुसार, महादेव शिवारऊके रा वलनी ता सावनेर यांनी अवघ्या दोन महिन्यांपूर्वी एक लाख वीस हजार रुपये खर्च करून बैलांची जोडी (Bull Lightning Death) खरेदी केली होती. आज पहिला पाऊस सुरू असताना विजांच्या कडकडाटासह अचानक वीज कोसळली. यावेळी शिवारऊके यांच्या बैलजोडीतील एका बैलाला विजेचा धक्का बसल्याने त्याचा जागीच मृत्यू झाला. नुकतीच खरेदी केलेल्या बैलजोडीतील एक बैल दगावल्याने शिवारऊके यांच्यावर मोठे आर्थिक संकट ओढवले आहे. शेतीच्या हंगामाच्या तोंडावर झालेल्या या नुकसानीमुळे त्यांच्या कुटुंबात हळहळ व्यक्त होत आहे.
घटनेची माहिती मिळताच ग्रामस्थांनी घटनास्थळी धाव घेतली. प्रशासनाने तातडीने पंचनामा करून संबंधित शेतकऱ्यास शासनाकडून आर्थिक मदत व नुकसानभरपाई द्यावी, अशी मागणी ग्रामस्थांकडून करण्यात येत आहे. हंगामातील पहिल्याच पावसात घडलेल्या या (Bull Lightning Death) घटनेमुळे परिसरात हळहळ व्यक्त होत असून, पावसाळ्यात विजांच्या कडकडाटाच्या वेळी जनावरे व नागरिकांनी सुरक्षिततेची काळजी घ्यावी, असे आवाहन करण्यात आले आहे.
