नवी दिल्ली (Assembly Election 2024) : निवडणूक आयोगाने आज 16 ऑगस्ट रोजी विज्ञान भवन, दिल्ली येथे आयोजित पत्रकार परिषदेत हरियाणा आणि जम्मू काश्मीर विधानसभा निवडणुकांच्या (Assembly Election 2024) तारखांची घोषणा केली. हरियाणामध्ये एका टप्प्यात आणि जम्मू-काश्मीरमध्ये तीन टप्प्यात मतदान होणार आहे. तर दोन्ही मतमोजणी एकाच दिवशी होणार आहे. हरियाणामध्ये 1 ऑक्टोबरला एकाच टप्प्यात मतदान होणार आहे. हरियाणा आणि जम्मू-काश्मीरमधील मतमोजणी एकाच वेळी 4 ऑक्टोबर 2024 रोजी होणार आहे.
मुख्य निवडणूक आयुक्त राजीव कुमार यांनी पत्रकार परिषदेत सांगितले की, नुकतेच आयोगाचे पथक जम्मू-काश्मीरमध्ये गेले तेव्हा सर्वांनी निवडणुका घेण्याचा आग्रह धरला. जम्मू-काश्मीरमधील जनतेला (Assembly Election 2024) निवडणुकीच्या माध्यमातून आपल्या ठिकाणचे चित्र बदलायचे आहे. 2024 च्या लोकसभा निवडणुकीत जम्मू-काश्मीरच्या मतदारांमध्येही उत्साह दिसून येत आहे.
निवडणूक आयुक्त राजीव कुमार म्हणाले की, हरियाणात 10 हजार 321 मतदार आहेत ज्यांचे वय 100 वर्षांपेक्षा जास्त आहे. हरियाणात एकूण 2.1 कोटी मतदार आहेत आणि मतदान केंद्रे 20629 केंद्रे आहेत. हरियाणातील गुडगाव, फरीदाबाद आणि सोनीपत येथील बहुमजली इमारतींमध्येही मतदान केंद्रे उभारली जाणार आहेत. जम्मू-काश्मीरमध्ये 360 मॉडेल केंद्रे आणि हरियाणामध्ये 150 मॉडेल केंद्रे असतील. जम्मू-काश्मीरमध्ये एकूण 11 हजार 338 मतदान केंद्रे असतील. सर्व मतदान केंद्रांवर सीसीटीव्ही कॅमेरे बसवण्यात येणार आहेत. जम्मू-काश्मीरमध्ये 20 ऑगस्टला आणि हरियाणात 27 ऑगस्टला मतदार याद्यांचे अंतिम प्रकाशन होणार आहे.
हरियाणा विधानसभा निवडणूक 2024
हरियाणात सध्या भाजपचे सरकार आहे. नायबसिंग सैनी हे मुख्यमंत्री आहेत. सध्याच्या हरियाणा (Assembly Election 2024) विधानसभेचा कार्यकाळ 3 नोव्हेंबर 2024 रोजी पूर्ण होत आहे. हरियाणात विधानसभेच्या एकूण 90 जागा आहेत. सध्या 87 जागा भरल्या आहेत. 3 जागा रिक्त आहेत. हरियाणात बहुमताचा आकडा 46 जागांचा आहे. सध्या, HLP-1 आणि एक अपक्ष यांच्या मदतीने भाजप 41 आमदारांसह सत्तेत आहे. हरियाणात विरोधी पक्षाच्या खात्यात काँग्रेसकडे 29, जेजेपीकडे 10, आयएनएलडीकडे एक आणि चार अपक्ष आमदार आहेत.
जम्मू आणि काश्मीर विधानसभा निवडणूक 2024
5 ऑगस्ट 2019 रोजी कलम 370 हटवून जम्मू-काश्मीरला केंद्रशासित प्रदेशाचा दर्जा देण्यात आला. केंद्रशासित प्रदेश झाल्यानंतर जम्मू-काश्मीरमध्ये पहिल्यांदाच (Assembly Election 2024) विधानसभा निवडणुका होत आहेत. 2018 मध्ये विधानसभा विसर्जित करण्यात आली. जम्मू-काश्मीर विधानसभेत एकूण 90 जागा आहेत. जम्मू प्रदेशात विधानसभेच्या 47 आणि काश्मीर प्रदेशात 43 जागा आहेत. जम्मू-काश्मीर निवडणुकीत शांतता आणि सुव्यवस्था राखणे हे सर्वात मोठे आव्हान आहे. राज्यत्व, सुरक्षा, रोजगार हे जम्मू-काश्मीर विधानसभा निवडणुकीचे प्रमुख मुद्दे आहेत.
