रुग्णांना फळवाटपाने सांगता
हिंगोली (Hingoli Nursing Week) : वैद्यकीय महाविद्यालय व जिल्हा रुग्णालय, हिंगोली येथे दिनांक ५ मे ते १२ मे २०२६ या कालावधीत ‘परिचारिका सप्ताह’ मोठ्या उत्साहात साजरा करण्यात आला. फ्लोरेन्स नाईटिंगेल यांच्या जयंतीनिमित्त दरवर्षी साजरा होणारा हा सप्ताह यंदा विशेष उपक्रमांनी गाजला. परिचारिकांच्या अंगी असलेल्या सुप्त गुणांना वाव देणे आणि त्यांच्या सेवाभावी कार्याचा गौरव करणे हा यामागील मुख्य उद्देश होता.
सप्ताहाच्या कालावधीत रुग्णालयात विविध क्रीडा स्पर्धांचे आयोजन करण्यात आले. कबड्डी, रस्सीखेच, लंगडी यांसारख्या पारंपरिक खेळांसोबतच बुद्धिबळ व कॅरम स्पर्धाही रंगल्या. याशिवाय सांस्कृतिक कार्यक्रमांतर्गत गायन, नृत्य, नाटिका व एकपात्री अभिनयाचे सादरीकरण परिचारिका भगिनींनी केले. रोज सकाळी फ्लोरेन्स नाईटिंगेल यांच्या प्रतिमेचे पूजन, दीपप्रज्वलन व सामूहिक प्रतिज्ञा घेऊन दिवसाची सुरुवात होत असे. ‘सेवेसाठी तत्पर’ या भावने सर्वांनी प्रतिज्ञा घेतली.
आज १२ मे रोजी जागतिक परिचारिका दिनाचे औचित्य साधून या सप्ताहाचा समारोप करण्यात आला. (Hingoli Nursing Week) समारोप कार्यक्रमाचे प्रमुख आकर्षण म्हणजे रुग्णालयातील सर्व आंतररुग्णांना फळांचे वाटप. डॉक्टर व परिचारिकांच्या हस्ते रुग्णांना सफरचंद, केळी व संत्री वाटण्यात आली. रुग्णांच्या चेहऱ्यावर समाधान दिसून आले.
या (Hingoli Nursing Week) कार्यक्रमाला वैद्यकीय महाविद्यालयाचे अधिष्ठाता डॉ. चक्रधर मुंगल, जिल्हा शल्य चिकित्सक डॉ. नितीन तडस, अतिरिक्त जिल्हा शल्य चिकित्सक डॉ. दीपक मोरे यांच्यासह डॉ. गोपाल कदम, डॉ. सचिन बोदगिरे, डॉ. विशाल पवार व इतर मान्यवर उपस्थित होते. तसेच मेट्रन बाळासाहेब चिंचकर, सहाय्यक अधिसेविका रागिनी जोशी, सहाय्यक अधिसेविका आशा क्षीरसागर, सर्व परिसेविका, अधिपरिचारिका, ब्रदर्स व परिचर्या प्रशिक्षणार्थी विद्यार्थी-विद्यार्थिनी मोठ्या संख्येने हजर होते.
कार्यक्रमाचे प्रास्ताविक मेट्रन चिंचकर यांनी केले तर आभार प्रदर्शन सहाय्यक अधिसेविका जोशी यांनी मानले. अधिष्ठाता डॉ. मुंगल यांनी मार्गदर्शन करताना परिचारिकांना रुग्णसेवेचा कणा संबोधले. जिल्हा शल्य चिकित्सक डॉ. तडस यांनी परिचारिकांच्या अथक परिश्रमाचे कौतुक केले. संपूर्ण सप्ताह यशस्वी करण्यासाठी सर्व परिचर्या विभागाने विशेष मेहनत घेतली.
