पुणे (Dilip Dhotre) : महाराष्ट्र नवनिर्माण सेनेचे अध्यक्ष राज ठाकरे यांचे निकटवर्तीय आणि पक्षाचे ज्येष्ठ नेते दिलीप धोत्रे यांच्या कारचा मुंबई-पुणे द्रुतगती मार्गावर भीषण अपघात झाल्याची माहिती समोर आली आहे. या अपघातात त्यांच्या Toyota Fortuner गाडीचा मोठ्या प्रमाणावर चुराडा झाला आहे.
या गंभीर अपघातात दिलीप धोत्रे जखमी झाले असून त्यांना उपचारासाठी पुण्यातील एका खासगी रुग्णालयात दाखल करण्यात आले आहे. त्यांच्या चालकाची प्रकृती चिंताजनक असल्याची प्राथमिक माहिती मिळत आहे. अपघात नेमका कसा घडला, याबाबत अद्याप स्पष्ट माहिती समोर आलेली नसून पोलिसांनी गुन्हा दाखल करून तपास सुरू केला आहे.
मिळालेल्या माहितीनुसार, धोत्रे हे मुंबईतील काम आटोपून आपल्या फॉर्च्युनरमधून पुण्याकडे परतत होते. याच दरम्यान, मुंबई-पुणे एक्सप्रेसवेवर रात्री उशिरा त्यांच्या वाहनाला अपघात झाला. धडक इतकी भीषण होती की गाडीचा पुढील भाग पूर्णपणे उद्ध्वस्त झाल्याचे दिसत आहे.
अपघातानंतर तत्काळ मदतकार्य राबवून धोत्रे आणि त्यांच्या चालकाला पुण्यातील रुग्णालयात हलवण्यात आले. सध्या तज्ज्ञ डॉक्टरांच्या देखरेखीखाली त्यांच्यावर उपचार सुरू आहेत. ही घटना समजताच मनसे कार्यकर्त्यांनी रुग्णालयात गर्दी केली आहे. दरम्यान, राज ठाकरे यांनीही या घटनेची माहिती घेतली असून डॉक्टरांकडून धोत्रे यांच्या प्रकृतीबाबत अद्ययावत माहिती घेत असल्याचे समजते. पोलिसांनी अपघातग्रस्त वाहन ताब्यात घेतले असून पुढील तपास सुरू आहे.
